Сонгуультай холбоотой хуурамч цахим хаяг нээж нэр дэвшигчдийн өмнөөс сөрөг сурталчилгаа хийх, улс төрийн зорилгоор хуурамч хаяг нээж байгааг цагдаагийн байгууллагаас мэдээллээ.  Тиймээс тус газар Фэйсбүүкийн төв захиргаатай хамтран ажиллах гэрээ хийжээ. Уг гэрээгээр илт гэмт хэргийн шинжтэй болон улс төрийн зорилготой мэдээ, мэдээлэл түгээсэн хаягийг блоклох эрхтэй болсон байна. Энэ талаар ЦЕГ-ын Хэвлэл мэдээллийн төвийн ажилтан Ё.Лхагвасүрэн "Өдрийн сонин"-д "Иш баримттай, баталгаатай бус, дам сонссон мэдээллийг олон нийтийн сүлжээнд цацах нь бусдын нэр хүндэд халдаж байгаа эрүүгийн гэмт хэрэг. Мөн аль нэг хүний өмнөөс нэрийг нь ашиглан хуурамч хаяг нээж, мэдээллийг олон нийтийн сүлжээгээр цацахдаа гүтгэлгийн шинжтэй, баримт нотолгоогүй түгээх нь эрүүгийн хэрэг үүсгэх шалтгаан болно. Өөрөөр хэлбэл, таны өмнөөс таны нэрээр хэн нэгэн этгээд хуурамч хаяг нээж бусдын нэр хүндэд халдаж, илт гүжирдсэн мэдээлэл түгээвэл энэ асуудлыг шийдүүлж болно. Тухайн хэрэглэгч өөрийнх нь нэр дээр өөр хаяг нээсэн болохыг мэдсэн бол Фэйсбүүкийн төв захиргаа руу захидал бичиж мэдэгдэх хэрэгтэй. Ингэснээр тус газраас хуурамч хаягийг блоклоно" хэмээжээ.

Д.Дуулим