ШӨХТГ-ын  дарга Т.Аюурсайхан нийслэлийн удирдлагыг шүүхэд өгөхөөр болжээ. Учир нь тэрээр өнгөрсөн долоо хоногт Нийслэлийн иргэдийн төлөөлөгчдийн хурлаас гаргасан “Зориулалтын дугуй түгжигч ашиглах журам” нь хууль зөрчсөн шийдвэр гэж үзжээ.  Тэгвэл энэ талаар НИТХ-ын Зохион байгуулалтын хэлтсийн дарга Б.Алтансоёмбо “Тухайн нутгийн өөрөө удирдах байгууллага нь нутаг дэвсгэрийнхээ хэмжээнд дагаж мөрдөх эрхийн акт,  журмыг батлан гаргах бүрэн эрхтэй.  Монгол Улсын Үндсэн хууль, Монгол улсын засаг захиргааны удирдлагын тухай хууль болон  бусад холбогдох хууль тогтоомжид энэ тухай заасан байдаг. Үүний  хүрээнд НИТХ энэ асуудлыг хэлэлцэн шийдвэрлэсэн. Энэхүү журмыг хууль зөрчөөгүй” хэмээн тайлбарлажээ. Мөн тэр ШӨХТГ нь НИТХ-аар гаргасан шийдвэрийг шалгах, эрхтэй эрхгүй гэж ярих байгууллага биш. Хурлын шийдвэр нь бусад хуультай  зөрчилдсөн эсэхийг нэгдүгээрт,  тухайн шийдвэрийг гаргагч, НИТХ-ынхан бид өөрсдөө авч хэлэлцэнэ. Хоёрдугаарт,  Захиргааны хэргийн шүүхээр шийдвэрлэсний дараа хууль тогтоомжийг хүчингүй болгох эсэх асуудал яригддаг гэж  мэдэгдсэн байна.  Гэвч  энэхүү  маргаантай асуудлаар ШӨХТГ-ын дарга Т.Аюурсайхан өнөөдөр Захиргааны хэргийн анхан шатны 20 дугаар шүүхэд гомдол гаргахаар болжээ.

Б.Баяр

Эх сурвалж: Tumen.mn