АПУ компанийн "Ариун алтан тэвш" гэрээт борлуулалтын дэлгүүр ажиллуулдаг Б.Алтанхуяг энэ сарын 15-нд сураггүй алга болжээ.

Тэр өдөр Хужирбулан, Гацуурт, Налайх чиглэлд шууд борлуулалт хийхээр ачааны микроавтобусаа унаад гарчээ. Биендээ 4 орчим сая төгрөг, 10 орчим сая төгрөгийн бараа ачиж явсан гэнэ. Хотоос зайдуухан дэлгүүрүүдэд бараагаа шууд аваачиж өгөхөд борлуулалт нь сайн, орлого нь ч нэмэгддэг байжээ. Хамаатныхаа дүүтэй хамтдаа явдаг байсан бол тэр өдөр дүү нь ажилтай болж ганцаараа явжээ.

Б.Алтанхуяг архи уудаггүй, бага насны 3 хүүтэй аж. Тэр өдөр эхнэррүүгээ яриад удахгүй хот орно, эмнэлэг дээрээ байж байгаарай гэсэн ч эхнэр нь хүлээж байхаар такси бариад гэртээ харилаа гэжээ. Түүний хоёр бага хүү ханиад хүрээд эмнэлэгт хэвтээд гарчээ. Ирэхгүй удаад байхаар нь 16 цагийн үед утсаар залгахад авахгүй байсан төдийгүй одоохон гэсэн мессеж ирүүлжээ. Нөхөр нь мессеж бичдэггүй, яагаад яаруулаагүй байхад одоохон гэсэн хариу ирүүлэв гээд ар гэрийнхэн нь гайхаж байгаа гэнэ. Хүүхдүүд нь аавыгаа нэхэж, эхнэр нь сэтгэлээр унаж, ах дүү нар аргаа бараад байгаа аж.

Сураггүй алга болсон энэ хэрэгт цагдаагийнхан хэрэг үүсгэж, камерыг шалгаж, эрж хайж байгаа юм байна. Нэг камерыг шалгахад тэрээр ганцаар явж бараа буулгаж байгаа дүрс олджээ. Ар гэрийнхэн нь түүнийг алга болсны АПУ-гийнхан нууцалж байсан гэдгийг дэлгэлээ.

Эх сурвалж: www.times.mn