Б.БАРС

Туркийн Станбулд болж буй олимпийн эрх олгох чөлөөт бөхийн сүүлчийн тэмцээнд эрэгтэйчүүдийн 97 кг-ын жинд Д.Хүдэрбулга амжилттай сайн барилдаж Рио-Де-Жанейрог зорихоор боллоо. Эхний тойрогт хийлсэн тэрээр Косовогийн Э.Шалаг 12:4, Тажикистаны Р.Искандарыг 11:0-ээр тус тус илүүрхэн хагас шигшээд шалгарч, олимпийн эрхийн төлөөх шийдвэрлэх барилдаанд Энэтхэгийн М.Хатриг 8:6-аар ялсан юм. Ингэснээр, манай чөлөөт бөхийн эрэгтэйчүүдийн шигшээ 1992 оноос хойш олимпийн наадамд анх удаа бүтэн багаараа оролцохоор боллоо. Д.Хүдэрбулгаас өмнө Э.Бэхбаяр (57 кг), Г.Мандахнаран (65 кг), П.Өнөрбат (74 кг), О.Үйтүмэн (86 кг), Ж.Чулуунбат (125 кг) тус тус олимпийн эрх аваад байсан билээ.

Эмэгтэйчүүдийн хувьд 48 кг-ын жинд барилдсан Э.Нарангэрэл Финландын С.Савола, Узбекистаны Д.Якшимуратова нарыг ялсан ч Польшийн И.Матковскад оноогоор цэвэр ялагдаж, 75 кг-д О.Бурмаа эхний тойрогт Польшийн Д.Ирсзулаг хожоод Азербайжаны Г.Зутовад цэвэр хожигдон олимпийн эрх авч чадсангүй. Иймд манай эмэгтэйчүүд Рио-Де-Жанейрогийн дэвжээнд дөрвөн жинд өрсөлдөх нь. Э.Сумъяа (53 кг), П.Орхон (58 кг), С.Батцэцэг (63 кг), О.Насанбурмаа (69 кг) урьд нь олимпийн эрх авсан юм.

Эх сурвалж: www.polit.mn