Нэр бүхий этгээд төрийн удирдах хариуцлагатай албан тушаалд буюу Дархан-Уул аймгийн Худалдан авах ажиллагааны албаны даргын үүргийг түр орлон гүйцэтгэгчээр хууль бусаар өнгөрсөн хоёрдугаар сард томилогдон ажиллах хугацаандаа хууль бус шийдвэрүүд гаргасан байна. Тухайлбал, гурван мэргэжилтэнтэй албаны хоёр мэргэжилтнийг үндэслэлгүйгээр ажлаас нь халж, төрийн албаны сонгон шалгаруулалтад хуулийн дагуу тавигдах шаардлагыг зөрчсөн талаар Дархан-Уул аймгийн иргэн Р.Отгонжаргал хэвлэлийнхэнд мэдээлэл хийлээ.
Энэ талаар түүнээс зарим зүйлийг тодруулсан юм.
-Дархан-Уул аймгийн Худалдан авах ажиллагааны хууль бус халаа сэлгээ, томилгооны талаар тодорхой мэдээлэл өгөхгүй юу?
-Дархан-Уул аймгийн Худалдан авах ажиллагааны газрын даргын сонгон шалгаруулалт хууль бусаар зарлагдаад байна. Өөрөөр хэлбэл, хуульд заасан шаардлагын дагуу бус, төрийн албаны тухай хуулийг зөрчиж сонгон шалгаруулалт, томилгоо явагдаж байгаа.
Хамгийн харамсалтай нь өөрсдийн хүнээ сонгон шалгаруулалтад тэнцүүлж, томилохын тулд хуулийг үл хүндэтгэн тухайн хүнд тохирох шаардлагуудыг гаргажээ. Энэ хууль бус асуудлаар би Төрийн албаны зөвлөлд өргөдөл гаргасан. Тэд тавдугаар сарын 02-нд 465 тоотоор хариу өгсөн. Уг хариу мэдэгдэлд "Худалдан авах ажиллагааны хуулийн 53-р зүйлийн 53.4-т зааснаар, худалдан авах ажиллагааны албаны нэгжийн дарга нь ял шийтгэлгүй, төрийн албанд 10-аас доошгүй жил ажилласан, түүнээс 3-аас доошгүй жилийг Худалдан авах ажиллагааны чиглэлээр ажилласан байна" гэдэг шаардлагыг тавиагүй. Тодруулбал, хуульд нийцэхгүйгээр сонгон шалгаруулалт зарласан байна гэдэг хариуг өгсөн. Улмаар хуулийн дагуу сонгон шалгаруулалт хийхийг мэдэгдэж холбогдох газарт албан бичиг хүртэл хүргүүлсэн байгаа.
Гэтэл дахин хууль бус сонгон шалгаруулалтыг зарласан. Төрийн албан хаагч, тэр дундаа төрийн удирдах албаныхан хуулийн дагуу сонгон шалгаруулалтад оролцож, хуулийн дагуу тухайн албанд томилогдох ёстой.
-Худалдан авах ажиллагааны газрын сонгон шалгаруулалтыг хууль журмын дагуу явуулахыг төв зөвлөлөөс нь гаргачихлаа. Гэтэл энэ шийдвэрийг хүлээж авахгүй байна гэж үү?
-Дахин сонгон шалгаруулалт зарлахдаа хууль зөрчсөн хэвээр байсан. Тиймээс миний бие энэ сарын эхээр Төрийн албаны төв зөвлөлд дахин гомдол гаргасан. Төрийн албаны зөвлөлөөс хариу ирэхдээ "Энэ тухай мэдээллийг салбар зөвлөлд хүргүүлсэн. Хоёрдугаарт, ажлын байрны тодорхойлолтыг тухайн ажлын байранд томилох эрх бүхий албан тушаалтан өөрөө боловсруулж баталгаажуулдаг байгаа" гэсэн хариу өгсөн.
Тодруулбал, хууль бусаар томилсон албан тушаалтандаа зориулж сонгон шалгаруулалтыг зарлах ёсгүй шүү дээ.
-Түр орлон гүйцэтгэгчээр томилогдсон хүн томилогдсон даруйдаа хоёр мэргэжилтэнг ажлаас нь халсан гэж байгаа. Энэ ямар учиртай юм бэ?
-2016 оны хоёрдугаар сард Г.Тамир гэж хүн Худалдан авах ажиллагааны газрын түр орлон гүйцэтгэгчээр томилогдсон. Төрийн албанд нэг ч жил ажлаагүй, тэгсэн хэрнээ улсад 10 жил ажилласан гэх энэ хүний хоёр албан хаагчийг хууль бусаар халсаныг Төрийн албаны төв зөвлөлөөс тогтоолгоод, шүүхэд хандсан байгаа.
