УИХ-ын 2015 оны намрын чуулган нээлтээ хийлээ. Чуулганыг нээж Их Хурлын дарга З.Энхболд үг хэлсэн юм. Тэрбээр, "Хаврын чуулган болон ээлжит бус чуулганаар хэлэлцэж амжаагүй зарим хуулиуд бий. Тиймээс намрын чуулганаар хэлэлцэх эхний асуудал болгон оруулж байна. Улсын төсөв 629.3 тэрбум төгрөгөөр тасарч байна. Түүхий эдийн үнэ огцом буурч байна. Тодруулбал нүүрс 150 ам.доллар байсан бол одоо 50 ам.доллар, зэс 7000-8000 ам.доллар байсан бол одоо 5000 ам.доллар болж уналаа.

Гэхдээ бид буруутныг гаднаас биш дотроосоо хайх хэрэгтэй. Оюутолгойн хөрөнгө оруулалтын өсөлт 17 хүрсэн. Үүнийг энэ хэвээрээ байх нь юм шиг төсөөлж нөхцөл байдалд тооцоо судалгаагүй их мөнгө зарцуулж байна. Өмнөх жилүүдэд төрийн байгууллагуудын хэрэглээ буурсан байна. Айл өрхийн хэрэглээ 4 дахин нэмэгдсэн нь эдийн засаг эрүүлжиж байгаагийн том жишээ юм.

Намрын чуулган цаг хугацааны хувьд ч хэлэлцэхээр төлөвлөсөн асуудлуудын хувьд ч хариуцлагатай чуулган болно. Нам эвслийн бүлгүүд, байнгын хороод асуудлыг цаг тухайд нь шийднэ. Та бүхэн чуулганы үйл ажиллагаанд сэтгэл зүтгэн гарган идэвхитэй ажиллахыг уриалж байна” гэсэн юм.

Ингэснээр энэ намрын чуулган үүдээ нээлээ. Одоо намын бүлгүүд болон байнгын хороод хуваарийн дагуу хуралдана.