58-р тойрогт буюу Нисэх, Өлзийт (Хан-Уул дүүргийн 9,10,14,16-р хороо) хороололд бие даан нэр дэвшигч Доноровын Гантулга нь 2016 оны 6-р сарын 12-ны билэгт сайн өдөр Нисэх дэх төв штаб болон Өлзийт хороолол дахь ухуулгын байрандаа сонгуулийн сурталчилгаагаа албан ёсоор нээж, тойргийн иргэд сонгогчидтой уулзаж ажиллалаа. Хүн-Хөдөлмөр-Хөгжил уриатай Доноровын Гантулгын мөрийн хөтөлбөрт нийслэл Улаанбаатар хот, цаашлаад Монгол улсын агаарын замын үүд босго нь болсон Нисэх, Өлзийт хороодод хийж бүтээх, шийдэх асуудал олноор туссан тул энэ тойрогт нэр дэвших болсон тухай мэдэгдэв. Хөдөөний суманд, эгэл ардын гэр бүлд төрж өссөн Д.Гантулга нь Лондон хотын Санхүүгийн Төвд мэргэжлээрээ ажиллах хүртэл туулсан туршлага, сурсан боловсрол, хуримтлуулсан эрдэм мэдлэгээ Монгол орны хөгжил цэцэглэлтэд зориулахаа мэдэгдээд Мөрийн хөтөлбөртөө багтсан бусад зорилго, зорилтуудыг танилцуулжээ. Тойргийн иргэд, сонгогчид үг хэлж, нэр цэвэр, алсын хараатай улс төрч болж ард түмний амьдралыг дээшлүүлэхийн төлөө тулж ажиллахыг захиж, сонгуулийн ажилд нь амжилт хүслээ.
Эх сурвалж: УИХ-ын сонгуулийн 58-р тойрогт бие даан нэр дэвшигч Доноровын Гантулгын төв штаб
