Халаасны хулгайн гэмт хэрэг үйлддэг гурван этгээдээс утас авдаг байсан дөрвөн ченжийг илрүүлсэн тухай цагдаагийн байгууллагаас мэдээлэл өглөө.
ЦЕГ-ын хэвлэл мэдээллийн төвөөс "Чингэлтэй дүүргийн нэгдүгээр хорооны нутаг дэвсгэрт байрлах "Монтел", "Тэди" худалдааны төвийн гадна болон дотор талд үйл ажиллагаа явуулдаг дөрвөн ченж хулгайн гар утас худалддаг байжээ.
Ингэхдээ нийтийн тээвэр, автобусны буудал, их, дээд сургууль, гудамж талбайд халаасны хулгай хийдэг гурван этгээдээс удаа дараа хямд үнээр утас авч, борлуулдаг байсан байна.
Нийслэлийн Цагдаагийн Удирдах газрын Мөрдөх шалгах газрын Халаасны хулгайн гэмт хэрэгтэй тэмцэх хэлтсийнхэн уг хэргийн хүрээнд нийт 264 гар утсыг эд мөрийн баримтаар хураан авч, мөрдөн шалгах ажиллагааг үргэлжлүүлж байна" гэв.
