Мансууруулах үйлчилгээтэй 6.4 кг өвс, 490 ширхэг андантенийг хураан авчээ
Сүүлийн жилүүдэд манай улсын иргэд хар тамхи тээвэрлэх, худалдан борлуулах, мансууруулах төрлийн гэмт хэрэгт холбогдох нь ихсэх хандлагатай байгаа. Тодруулж хэлбэл, Цагдаагийн байгууллагаас 2010- 2015 оны эхний таван сарын байдлаар нийт 677 холбогдогчтой 213 гэмт хэргийг илрүүлж, мөрдөн байцаалтын үйл ажиллагаа явуулжээ. Улмаар 2010 онд хар тамхины хэрэгт 75 иргэн холбогдож байсан бол энэ тоо өссөөр 2014 онд хоёр дахин буюу 132 болтлоо өссөн байна.
Түүнчлэн ойрын өдрүүдэд цагдаагийн байгууллага хар тамхитай холбогдох хэргүүдийг илрүүлэн шалгаж буй талаар хэвлэл мэдээллийн хэрэгслүүд мэдээлэх болсон тул ЦЕГ-ын Эрүүгийн цагдаагийн газрын Хар тамхитай тэмцэх хэлтсийн хэрэг илрүүлэлтийн талаар албан ёсны мэдээлэл хийлээ.
ЦЕГ-ын Эрүүгийн цагдаагийн газрын Хар тамхитай тэмцэх хэлтсийн албан хаагчид өнгөрсөн сарын 20-ны өдрөөс энэ сарын 02-ны өдрийг хүртэлх, нийт 12 хоногийн хугацаанд 21 холбогдогчтой, 10 гэмт хэргийг илрүүлэн шалгаж буй аж.
Дээрх гэмт хэрэгт холбогдон шалгагдаж буй сэжигтнүүдээс урд өмнө нь ял шийтгэл эдэлсэн зургаан иргэн байгаагаас Б, Э,Эн нар нь эрүүгийн хуулийн 192, 192.1 зүйлүүд буюу “Мансууруулах болон сэтгэцэд нөлөөлөх эм бэлдмэл, бодисыг хууль бусаар бэлтгэх, олж авах, хадгалах, тээвэрлэх, илгээх борлуулсан” хэргээр ял эдэлж байсан нь мөрдөн байцаалтын явцад тогтоогдсон байна.
Сэжигтнүүдийн орон байр, тээврийн хэрэгсэл, биед хийсэн үзлэгээр метамфетамины төрөл болох ICE буюу мөс 111.1 гр, гашиш 15.5 гр, өвс 6.4 кг, андантен 490 ширхгийг илрүүлж, эд мөрийн баримтар хураан авчээ.
Андантен эмийн хэрэглээг хязгаарласан болохыг анхааруулав
Анхааруулга: Монгол улсад 2009 оноос эхлэн эмийн сангуудаар худалдаалагдах болсон Унгар улсын Андантен эм нь мансууруулах үйлчилгээтэй тул иргэд уг эмэнд мансуурах, гар дээрээс дамнан худалдах зэрэг зөрчлүүд Цагдаагийн байгууллагад олноор бүртгэгдэх болсон байна. Тиймээс Цагдаагийн байгууллагаас уг эмийг худалдан борлуулахгүй байх хүсэлтийг холбогдох газруудад тавьснаар энэ оны хоёрдугаар сарын 24-ны өдрийн Эрүүл мэндийн сайдын тушаалаар Мансууруулах үйлчилгээтэй эмийн жагсаалтад оруулан, эмийн сангуудаар худалдан борлуулахыг албан ёсоор хоригложээ.
Уг хоригтой холбоотойгоор иргэд Андантен эмийг гар дээрээс худалдах, их хэмжээгээр биедээ авч явах, тээвэрлэх, мансуурах зөрчил гаргасан тохиолдолд хар тамхины хэрэгт хамааруулан, эрүүгийн хэрэг үүсгэн, мөрдөн байцаах үйл ажиллагааг явуулна гэдгийг Цагдаагийн байгууллагаас анхаарууллаа.
Хар тамхины хэргээр урлагийнхан баривчлагдаагүй
Мэдээллийн үеэр ЦЕГ-ын Хэвлэл мэдээллийн төвийн дарга Б.Баатархүүгээс хар тамхины хэрэгт холбоотой мэдээлллээр тодруулга авлаа.
- Мансууруулах үйлчилгээтэй бодисууд хил гаалийн шалгалтаар илрэлгүй, гаднаас орж ирсэн тохиолдлууд Цагдаагийн байгууллагад хэр их бүртгэгдэж байна бэ?
- ICE буюу мөс гаднаас орж ирдэг. Монгол улсад энэ төрлийн бодисыг гарган авах ямар нэгэн бодис, ургамал байдаггүй. Мөс өөрөө жин багатай, далдлах боломж өндөр байдаг учраас хил гаалиар хууль бусаар нэвтрэн орж ирэх тохиолдлууд бүртгэгдэх нь бий.
Мөн Монгол улсын нутаг дэвсгэрт ургадаг өвсний төрлийн ургамлыг гар аргаар боловсруулан, мансууруулах үйлчилгээг нэмэгдүүлэх бусдад худалдах, өөрсдөө хэрэглэсэн хэргүүд илэрдэг.
Өнгөрсөн сарын 20-ны өдрөөс энэ сарын 02-ны өдрийг хүртэлх хугацаанд илрүүлсэн хэргүүдэд мөн энэ төрлийн өвсийг хэрэглэсэн, худалдаалсан, хууль бусаар хил нэвтрүүлсэн хэргүүд үйлдсэн этгээдүүдийг эд мөрийн баримттайгаар илрүүлсэн байгаа.
- Цагдаагийн байгууллагаас энэ төрлийн гэмт хэрэгтэй тэмцэх талаар ямар арга хэмжээ авч ажиллаж байна бэ?
- Цагдаагийн байгууллагын тухайд бол ЦЕГ-ын Эрүүгийн цагдаагийн газрын Хар тамхитай тэмцэх хэлтэс ажиллаж байгаа. Хэлтэсийн байнгын үйл ажиллагаанаас гадна цагдаагийн байгууллагын нутаг хариуцсан нэгжүүд хар тамхины хэрэглээг илрүүлэх, хяналт тавих үүрэг хүлээн ажиллаж байна.
- Мансууруулах бодис хэрэглэж буй хүмүүсийн насны хувьд?
- Ихэвчлэн залуучууд хар тамхи, мансууруулах төрлийн бодис хэрэглэх нь элбэг байна. Сүүлийн 12 хоногийн мөрдөн шалгалтаар илэрсэн 10 хэрэгт эмэгтэй хүн оролцсон болох нь тогтоогдсон.
- Олуулаа нэг дор хэрэглэж байгаад мансуурлын байдалтайгаар цагдаагийн байгууллагад илчлэгдсэн тохиолдол сүүлийн хэргүүдэд гарсан уу?
- Одоогоор цагдаагийн байгууллагаас мөрдөн байцаалтын үйл ажиллагаа явуулж байгаа тул энэ талаар дэлгэрэнгүй мэдээлэл өгөх боломжгүй. Шүүх эцэслэн тогтоох учиртай.
- Олны танил нэр бүхий, бүр тодруулж хэлбэл урлагийнхан сүүлийн хэрэгт холбогдсон гэх мэдээлэл бий. Энэ тухайд?
- Хувь хүний нууцад хамаарах зүйлийг бид хуулиараа нууцлах үүрэгтэй. Шүүхээр эцэслэн гэм буруутайг нь тогтоох хүртэл хувь хүний нууцыг хамгаалдаг. Тийм учраас тодорхой мэдээлэл өгөх боломжгүй. Гэхдээ тодруулж хэлэхэд сүүлийн хэрэгт урлагийн хүмүүс холбогдоогүй. Ер нь бол хар тамхины хэргээр нэлээд гарших маягтай болчихсон, хүнд төрлийн хүмүүсийг илрүүлсэн гэж хэлж болно.
Ж.Мядагбадам
