НҮБ-ын Хүний эрхийн зөвлөл энэ сарын 5-нд Монгол улсын хүний эрхийн төлөв байдлын тайланг хэлэлцсэн тухай бид мэдээлсэн. Энэхүү тайланг Засгийн газраас илгээсэн байлаа. Харин хүний  эрхийн төлөө ажилладаг төрийн бус байгууллагуудаас илгээсэн тайлан НҮБ-ын ажилтнуудын анхаарлыг бас нэлээд  татжээ. Учир нь манай төрийн бус байгууллагуудын тайлан нь Засгийн газрын тайлангаас тэс өөр, баримт нотолгоо сайтай болсон байна. Тухайлбал, тэдний тайланд УИХ-ын Хүний эрхийн дэд хорооны эрх мэдэл, чадавхи сул байгааг дурьджээ. Энэ нь УИХ-ын гишүүдийн хүний эрхийн талаарх мэдлэг муу байгаатай холбоотой аж. УИХ-ын гишүүд болон Үндсэн хуулийн цэцийн гишүүдийн хэргийг шалгахад “Халдашгүй бүрэн эрх”-тэй холбоотой хууль саад болж байгааг мөн онцолсон байна. Тодруулбал, УИХ-ын гишүүн Ё.Отгонбаяр, Үндсэн хуулийн цэцийн гишүүн Д.Сугар нарын хэрэг төд удалгүй чимээгүй болсон гэжээ. Түүнчлэн эрүүдэн шүүх ажиллагаа Монголд хэвээр байгааг тайланд бичсэн байна. Цагдаагийн ажилтнуудын эрүү шүүлтийн шинжтэй ажиллагаанд бие даан мөрдөн шалгалт хийдэг Прокурорын байгууллагын дэргэдэх мөрдөн шалгах албыг татан буулгасан нь Засгийн газрын том ухралт болсон гэдгийг тэд бас хэлжээ. Ерөнхий сайд асан Н.Алтанхуягийн зөвлөхөөр ажиллаж байсан Л.Гансүх нарыг баривчилсан баримтыг энд жишээ болгож оруулсан байна. Цагдаагийнхан эрүүдэн шүүх болон бусад хэлбэрээр цэрцгий, хүнлэг бусаар харьцаж, хүний нэр төрийг доромжлон, цагдан хорих байр дамжуулан хорьж, сэтгэл зүйн дарамт учруулдагийг ч нуусангүй. Ийнхүү төрийн бус байгууллагууд НҮБ-д монголынхоо хууль хяналтын байгууллагуудыг “матав”. 

Б.Баяр  

Эх сурвлаж: Tumen.mn