Махны үнэ дахиад л өсөв. Энэ удаагийн өсөлтийг өнгөрсөн оныхтой харьцуулахад килограмм тутамдаа 1500-2000 төгрөгөөр өсчээ. Өнөөдрийн байдлаар “Хүчит шонхор” худалдааны төвд үхрийн нэг кг мах 7300-8500, хониных 7000-7500, ямааных 5700-6000 төгрөг байна. “Бөмбөгөр”, “Хар хорин” захуудад харин дундаар нэг км мах 8000-9000 төгрөг болжээ. Махны үнэ тогтворжуулах дэд хөтөлбөрийн үр дүн  харагдахгүй байгаа нь энэ. Иргэд хямд үнэтэй нөөцийг мах худалдаанд хэзээ гарахыг  тэсэн ядан хүлээж байна. Нөөцийн мах бэлтгэх компаниуд төрөөс хөнгөлөлттэй нөхцөлөөр зээл авч махаа нөөцөлсөн. Гэтэл сураг алга. Уг нь мах бэлтгэх, хадгалах, жижиглэн худалдаанд нийлүүлэх зардлыг нь нэг кг тутамд 1000 төгрөгөөр тооцож байхаар төрөөс компаниудтай гэрээ байгуулсан гэдэг. Гэтэл өнгөрсөн онд төр нь гэрээнд заасан энэ үүргээ биелүүлээгүй,  компаниуддаа 4.5 тэрбум төгрөгийн өртэй болоод байгаа аж. Нөөцийг мах нийлүүлэх үнийг төрөөс хатуу заагаад өгчихсөн. Гэвч мөнгийг нь өгөөгүй тул компаниуд нөөцөлсөн махаа нийлүүлээд ч ашиг олохгүйд хүрчээ. Ингээд дээгүүрээ баахан хэл ам хэрүүл шуугиан үүсгэж яваа юм байна.

Б.Баяр

Эх сурвалж: Unen.mn