Монголын театрын урлаг өөрийн гэсэн өвөрмөц түүхтэй. Энэ түүх үе үеийн уран бүтээлчдийн арвин намтраас эхтэй бөгөөд энэхүү сан хөмрөгийг “Урлагийн номын сан” цувралаас бас харж болох ажээ. Хамгийн сүүлд энэ цувралд “Театрын өндөр ээж” хэмээх нэгэн бүтээл жин даран орж ирлээ. Уг номыг “Бадрангуй урлаг” Төрийн бус байгууллагаас санаачлан Н.Сарангэрэл, Д.Отгонбаяр нар бүтээжээ. Ном бүхэлдээ Монгол улсын гавъяат жүжигчин Лха.Долгор гуайн дурсамж , театрын урлагийн алтан үеийнхний түүхийн ховор агшин бүрээс дээжлэн бүрдсэн байна. Номын нээлт Театрын урлагийн музейд болсон бөгөөд энэ үеэр Лха.Долгор гуайн хамтран зүтгэгчдээс хүрэлцэн ирсэн байлаа. Номын удиртгал хэсэгт “Үе үеийнхэн өөрийнхөө цаг үеийн түүхийг бүтээж байдаг. Гавъяат жүжигчин Лхамжавын Долгор Монголын театрын урлагийн нэгэн цаг үеийн түүхийг бичилцэж явсан тэр дурсамжаа танд хүүрнэн өгүүлэх болно” хэмээн зохиогчид нь бичжээ.
Б.Баяр
Эх сурвалж: Tumen.mn
