Манай улсын Засгийн газар Дэлхийн банкны дэмжлэгтэйгээр Сэлэнгэ мөрөнд 300 мегаваттын хүчин чадалтай усан цахилгаан станц барих “Шүрэнгийн усан цахилгаан станц” төслийг хэрэгжүүлэх гэсэн биш чамгүй хэл ам дагуулж байгаа сүүлийн жилүүдэд. Өнгөрсөн оны 12 дугаар сард Францын нийслэл Парист болсон экологийн асуудлаарх НҮБ-ын бага хурлын үеэр Монгол Улс Сэлэнгэ мөрөн дээр Усан цахилгаан станц барих гэж байгааг эсэргүүцсэн жагсаал хүртэл болж байсан. Байгаль хамгаалах “Хил хязгааргүй гол мөрөн” эвсэл, Greenpeace байгууллагууд НҮБ-д захидал бичиж эрчим хүчний эх үүсвэр болгож Байгаль нуурын гол цутгал мөрөн дээр том Усан цахилгаан станц барих гэж байгааг болиулахыг уриалсан байдаг. Тэд эсэргүүцэлдээ Монгол Улс Сэлэнгэ мөрөн дээр усан цахилгаан станц барих, мөн Оросын Ангар мөрөн дээрх усан цахилгаан станц нь Байгал нуур болон түүний эргэн тойрны экосистемд сүйрлийн нөлөө үзүүлнэ гэсэн байдаг.. “Хил хязгааргүй гол мөрөн” эвслийн зохицуулагч Александра Колотова itkutskmedia.ru сайтад “Сэлэнгэ мөрөн дээр Усан цахилгаан станц барих юм бол Байгал нуур мөхлийн ирмэгт ирнэ. Ус бохирдон, усан хангамж муудаж, намагшин хөрсний гулгаа, газар хөдлөл болж мэднэ. Энэ бүхний эцэст ямар сүйрэл болохыг би хэлж мэдэхгүй” хэмээн ярьсан байдаг.
Тэгвэл ОХУ-ын Ерөнхийлөгч В.Путин Монгол, Орос, Хятад гурван улсын тэргүүн нарын уулзалтын үеэр хэлсэн үгэндээ уг асуудлаарх байр сууриа тод томруун илэрхийллээ. Тэрбээр “Бүс нутгийн экологийн хамтын ажиллагааны салбарт ихээхэн эерэг өөрчлөлт бидний нүдэн дээр өрнөж байгааг тэмдэглье. Сэлэнгэ мөрний сав газарт усан байгууламжууд барихаар Монголын тал төлөвлөж байгааг бид бүхэн мэднэ. Монголын нөхөд болон БНХАУ-тай энэхүү асуудлыг маш нухацтай судлахыг бид хүсч байна.
ОХУ болон олон улсын байгаль хамгааллын байгууллагуудын энэхүү төслийн талаар баримталж буй байр суурь тодорхой. Төслийг хэрэгжүүлэх нь манай Эрхүү мужийн усан хангамж болон Байгал нуурын өвөрмөц экологид тодорхой эрсдэл учруулах боломжтой. Сэлэнгэ мөрөн нь Байгал нуурын үндсэн цутгал юм.
Монгол Улсын эрчим хүчний хомсдолтой холбогдох асуудал нь чухал гэдгийг бид ойлгож байна. Энэ талаар бодолцож, асуудлыг шийдвэрлэх хэрэгтэй. Гэхдээ энэ асуудлыг олон төрлийн аргаар, юуны өмнө, бүс нутгийн эрчим хүчний цогцолборыг хөгжүүлэх замаар шийдвэрлэх боломжтой. Жишээлбэл, Оросын цахилгаан станцуудаас Монгол Улсын хойд бүс нутаг руу нийлүүлэх эрчим хүчний хэмжээг нэмэгдүүлэх бололцоотой.” хэмээлээ. Тэгэхээр Орос улс Сэлэнгэ мөрний сав газарт усан цахилгаан станц барих асуудал дээр бол яагаад ч буулт хийхгүй гэдгээ ийн мэдэгдлээ.
Эх сурвалж: Б.Тамир, Шуурхай.мн
