"ТОП-100” аж, ахуйн нэгжийг тодруулж, өргөмжлөх ёслолын арга хэмжээ Төрийн ордоны ёслол хүндэтгэлийн танхимд боллоо.
Нийгэм, эдийн засгийн гол хүч болсон Монгол улсын хамгийн том түүхэн бүтээн байгуулалт болох уулын баяжуулах "Эрдэнэт үйлдвэр” ТӨҮГ 17 дахь жилдээ ТОП-100 аж ахуйн нэгжээр шалгарч, 2018 оны шилдэг аж ахуйн нэгжийг тэргүүллээ.
"Эрдэнэт үйлдвэр” ТӨҮГ нь 2018 онд онцгой амжилттай ажилласан бөгөөд 40 жилийнхээ түүхт ой тохиосон, техник, технологи, эдийн засаг, санхүүгийн үзүүлэлтээрээ 40 жилйн түүхэнд байгаагүй өндөр хэмжээнд хүрч ТОП-100 аж ахуйн нэгжээр 17 дахь удаагаа шалгарч байгаад баяртай байна” хэмээн "Эрдэнэт үйлдвэр” ТӨҮГ-ын ерөнхий захирал Х.Бадамсүрэн онцлон тэмдэглэлээ.
Тус үйлдвэр нь 2016 онд 184 тэрбум төгрөг, 2017 онд 580 тэрбум төгрөг, 2018 онд 655 тэрбум төгрөгийг улсын төсөвт төвлөрүүлсэн нь уг үйлдвэрийн нэг ажилтан 100 сая төгрөгийн баялаг бүтээсэн үг юм.
ТОП-100 аж ахуйн нэгжийг Сангийн яам, Татварын ерөнхий газар, Гаалийн ерөнхий газар, Үндэсний статистикийн хороо зэрэг байгууллагын статистик мэдээлэлд үндэслэн ААН-үүдийн жилийн орлого, ашиг, улсын төсөвт оруулсан татвар, ажиллагсдын тоо, хөрөнгийн хэмжээ гэсэн үндсэн таван үзүүлэлтээр компаниудыг эрэмбэлдэг юм.
Энэ жилийн шилдэг ААН-ийн борлуулалтын орлогын хэмжээ өнгөрсөн оноос 5 их наяд төгрөгөөр өсөж, 30 их наяд төгрөгт хүрсэн нь ДНБ-ний 96 хувийг эзэлж байна.
Түүнчлэн татвар төлсөн хэмжээ өмнөх жилээс 29 хувиар өсөж, 4,1 их наяд төгрөгт хүрсэн нь Монгол улсын татварын нийт орлогын 50 хувьтай тэнцэж байна.
