Хүүхдийн хүмүүжил, төлөвшлийн 80-90 хувь нь эцэг эх, гэр бүлээс шууд хамааралтайг судлаачид нотолдог. Мэдээж хүүхэд өсгөнө гэдэг амаргүй ажил. Ялангуяа бага насны хүүхэд таны хийсэн болгоныг дуурайж, таны хэлснийг зөв гэж ойлгодог. Тиймээс та үр хүүхдэдээ зөв үлгэр дуурайл үзүүлж, зааж сургах нь таны үүрэг билээ. Хэд хоногийн өмнө автобусны арын суудалд гэр бүлийн хоёр миний хажууд суусан юм. Хүүхэд нь тав орчим настай. 
 

Эцэг, эх нь хүүхдийнхээ яриаг сонсож, харилцан ярьж байгаа нь надад тааламжтай санагдлаа. Учир нь, томчууд хүүхдийн яриаг төдийлөн анхаарч сонсдоггүй шүү дээ. Тэр хүүхэд цэцэрлэгтээ болсон бүх л зүйлээ аав, ээждээ ярьж байв. Гэтэл хүүхдийнхээ яриан дундуур ээж нь “Миний хүүг ангийнх нь хүүхдүүд дээрэлхэж байна уу. 
 

Дээрэлхээд байвал миний хүү зүгээр “Шанаадаад унага, үхтэл нь зод” гэж байх юм. Мэдээж тэр ээж чин сэтгэлээсээ хэлээгүй л байх. Харин балчирхан үр нь түүнийг шууд хүлээж авч байлаа. “Нээрээ болох юм уу. Би тэгвэл ингээд цохино” гээд ээждээ хөдөлгөөнөөрөө дүрслэн үзүүлж гарав. Магадгүй таны тоглож хэлсэн үг хүүхдэд шууд тусдаг бол яах вэ. Хүүхэд тань ангийнхаа хүүхдийг зодвол та яах вэ. Хэрэв тэр хүүхэд ангийнхаа хүүхдийг зодчихвол ээж нь мэдээж хүүхдээ л зэмлэж, буруутгана. Хүүхдэд зөв зүйл зааж сургах ёстой эцэг, эхчүүд санаатай болон санамсаргүйгээр энэ мэт буруу үлгэр дуурайл үзүүлж байгаагаа анзаардаггүй бололтой. Тиймээс эцэг, эхчүүд үр хүүхдэдээ хэлэх үгээ бодож, тэдэндээ аль болох сайн сайхан бүхнийг зааж сургаж байхыг хичээгээрэй.