Монгол Улсын Ерөнхийлөгч Ц.Элбэгдорж С1 телевизийн “Цензургүй яриа” нэвтрүүлэгт өчигдөр оролцсон.  Тэрбээр нийгэмд үүсээд буй олон асуудлын талаар дэлгэрэнгүй тайлбар өгсөн юм.  Түүний яриаг тоймлон хүргэж байна. 

-“Цензургүй яриа” нэвтрүүлэгт бид нар шиг хүмүүс биш зах дээр зогсож байгаа худалдагчийг урьж оролцуулах хэрэгтэй.  Тэдний хэлж буй үнэн үгийг сонсох хэрэгтэй. Миний хэлж буйгаар Монголоо бодно гэдэг нь тэдний үгийг сонсоно гэсэн үг. Монголд үнэхээр хөрөнгө оруулалт хэрэгтэй.  Монголын эдийн засагт нэмэгдэл мөнгө хэрэгтэй.  Нөгөө талаас монголын нэлээн олон аж ахуйн нэгжүүд татварын маргаантай байгаа.  Үүн дээр бид нар нэг жишиг тогтоох хэрэгтэй. 

Бид хуулийн дагуу л асуудал  шийдэж байгаа.  Ж.Капла нарт уучлал үзүүлсэн нь ямар нэгэн хууль огт зөрчөөгүй.  Үүнийг бүх талаас нь судалж үзэж байгаа шүү дээ.  Харин хүмүүс янз бүрээр байр сууриа илэрхийлж, ярих эрхтэй.  Тэгэхээр ер нь ийм асуудал, ийм галыг өөр дээрээ авч сурах хэрэгтэй гэж боддог.  Түүнчлэн би цэвэр татварын асуудлаар ял эдэлж байгаа хүмүүс хэр байна гэж судалгаа хийж байсан.  Тэгэхэд хоёр хүний нэр гарч ирсэн,тэдэнд уучлал үзүүлсэн.  Харин хэвлэлээр яриад байгаа тэр 35 тэрбум төгрөгийг төлөх асуудалд хоёр ялгаа байгаа юм.  Тэр гурван хүн хоригдсон ялаа уучлуулах хүсэлтээ өөрсдийнхөө гараар бичиж хандсан.  Нэг үгээр хэлбэл хэргээ хүлээн зөвшөөрсөн гэсэн үг.  Нөгөө талаар тухайн аж ахуйн нэгж татварынхаа асуудлаар давж заалдсан.  Иргэн, аж ахуйн нэгж тусдаа асуудал.  Өнөөдөр 35 тэрбум төгрөгийг төлөх ёстой гэсэн шүүхийн шийдвэр хүчин төгөлдөр байгаа. 

“Ноён” уулын асуудлыг орон нутгийн иргэдээс нь асуух хэрэгтэй

-“Ноён” уулын асуудал дээр миний байр суурь хэвээр байгаа.  Тодруулбал, орон нутгийн иргэдээс нь асуух ёстой.  Тэдэнтэй зөвлөх хэрэгтэй.  Мөн өвөг дээдсийн онгон шүтээнийг хөндөх гэж байгаа бол тэнд ямар нэгэн ухалт хийж болохгүй.  Байгаль орчинд халтай байгаа бол тийм малтлага үйлдэл хийж болохгүй.  Надруу олон хүн энэ талаар ярьж утасдаг. Миний бодлоор тухайн газарт нь Засгийн газар, Их хурлын гишүүд нь очоод ярилцах хэрэгтэй.  Мөн олон нийтийн хөдөлгөөн, тухайн сумын иргэд оролцоод асуудлаа ярих хэрэгтэй.

Ц.Мөнхбаярын өөрийн гараар бичсэн өргөдөл надад ирээгүй

-Ц.Мөнхбаяр өмнө нь бас нэг хэрэгт холбогдож тэр нь явсаар байгаад хэрэгсэхгүй болж байсан удаатай.  Харин саяны хэргийн тухайд ч гэсэн шүүхийн зүгээс хамгийн хөнгөлттэй байж болох бүх л нөхцөлийг үзүүлсэн байдаг.  Буу, шийдэм бариад явж байгаа нь 20 гаруй жилийн ялтай хэрэг шүү дээ.  Тэр нь явсаар байгаад 7 жил болсон.  Миний нэг баримталж байгаа зүйл бол хэчнээн гэгээн сайхан зорилго байсан ч гэлээ түүнийг буу шийдмээр шийдэж болохгүй.  Энэ зам руу Монгол хальтарч болохгүй.  Ц.Мөнхбаярыг өмнө шүүхээр ороод гарч ирэхэд бид уулзаж байсан.  Бид нар нийгэм өөрчлөхдөө чулуу барьж, ордон луу шидэж байгаагүй.  Иргэний нийгэм бол хамгийн иргэнлэг байдлаар л явах ёстой гэдгийг хэлж байсан. Харин уучлалын тухайд бол Ц.Мөнхбаярыг төлөөлж хүмүүс шаардлага тавьдаг.  Яг уучлах үндэслэл бол тэр ялтан гэм зэмээ ухаарч ойлгоод гараараа өргөдөл бичих явдал.  Ц.Мөнхбаярын өөрийн гараар бичсэн өргөдөл над дээр ирээгүй. 

Эх сурвалж: Unen.mn