Л.Гансүхийн шүүх хурал дөрвөн хоног үргэлжиллээ
Өнгөрсөн долоо хоногийн хамгийн онцлох үйл явдал Ерөнхий сайд асан Н.Алтанхуягийн ахлах зөвлөх Л.Гансүхийн шүүх хурал байлаа. Олон нийтэд нээлттэйгээр шууд дамжуулан үзүүлсэн нь хүмүүсийн анхаарлыг ихэд татсан юм. Дөрвөн өдөр үргэлжилсэн шүүх хурал 1 дэхид ч дахин үргэлжилнэ. Хурлаар Л.Гансүхийн гэм буруутайг тогтоох юм.
Л.Гансүхийг Шинэчлэлийн Засгийн газраас хэрэгжүүлсэн "Нүүрс" хөтөлбөрийн хөрөнгөнөөс 3.6 тэрбум төгрөг завшсан хэрэгт буруутган шүүж байгаа. Тодруулбал, Эрүүгийн хуулийн тусгай ангийн 166.2, 263.2-т зааснаар буруутган шүүж байгаа юм. Харин шүүх хурлын үеэр гэрчүүдийн ихэнх нь мэдүүлгээсээ буцаж, өөрсдийгөө хохирогч биш АТГ хохирогчоор тогтоосон учраас шүүх хуралд оролцож байгаа хэмээн мэдүүлж байв. Мөн энэ шүүх хурлаар Ерөнхий сайд асан, УИХ-ын гишүүн Н.Алтанхуяг мэдүүлэг өгсөн. Тэрбээр "Нүүрс хөтөлбөрт Л.Гансүх ямарч буруугүй. Тэрбээр харин ч шагнуулах гавьяа байгуулсан хүн" хэмээн мэдүүлсэн билээ. Шүүх хурал даваа гаригт дахин үргэлжилнэ.
Өршөөлийн хуульд тавьсан Ерөнхийлөгчийн хоригийг УИХ хүлээж авлаа
Байнгын үйл ажиллагаатай парламенттай болсон 25 жилийн ойд зориулж Их хурлаас Өршөөлийн хуулийг санаачлан гаргасан. Гэвч "авилга, хээл хахууль болон албан тушаалын гэмт хэрэгтнүүдийг өршөөх гэж байна" хэмээн Ерөнхийлөгч хориг тавьсан.
Хоригийг УИХ хүлээж авах уу, үгүй юу гэдэг нь хорь гаруй хоногийн турш нийгэмд таамаг төдий байсан. Тэгвэл өнгөрч буй долоо хоногт хуралдсан ээлжит бус чуулганаар Өршөөлийн хуульд тавьсан Ерөнхийлөгчийн хоригийг хүлээж авлаа. Тодруулбал, УИХ-ын чуулганы нэгдсэн хуралдаанаар Өршөөл үзүүлэх тухай хуулийн 4.1 дэх заалтад тавьсан хоригийг хүлээн авъя гэсэн томъёоллоор санал хураахад гишүүдийн 81.1 хувь нь дэмжсэн. Хуралдаанд нийт 59 гишүүн оролцсоноос 48 нь зөвшөөрсөн юм. Мөн хуулийн долдугаар зүйлд тавьсан хоригийг хүлээн авах нь зүйтэй гэсэн саналын томъёоллоор санал хураалгахад хуралд оролцсон 59 гишүүнээс 49 нь зөвшөөрч 83.1 хувийн саналаар дэмжлээ. Тогтоолыг батлахад гишүүдийн 59-49 нь зөвшөөрч 83.1 хувийн саналаар батлагдсан. Улсын Их Хурлын бусад шийдвэрт Ерөнхийлөгч чуулганы чөлөөт цагт хориг тавьсан бол ээлжит болон ээлжит бус чуулган эхэлснээс хойш 10 хоногийн дотор хэлэлцэн шийдвэрлэж, тогтоол батална гэж Улсын Их Хурлын чуулганы хуралдааны дэгийн тухай хуулийн 31 дүгээр зүйлийн 31.1 дэх хэсэгт заасны дагуу Улсын Их Хурал Ерөнхийлөгчийн хоригийг 2015 оны 09 дүгээр сарын 15-ны өдөр хэлэлцэн хүлээн авч, тогтоол гарган шийдвэрлэлээ. Ингэснээр Өршөөлийн тухай хуулийн 4 дүгээр зүйлийн 4.1 болон 7 дугаар зүйл уг хуулиас хасагдан Өршөөлийн тухай хуулийн бусад, хүчин төгөлдөр Өршөөлийн тухай хуулийн дагуу өршөөл үзүүлэх ажиллагааг Өршөөл үзүүлэх комисс эрхлэн гүйцэтгэнэ.
ЕАБХАБ-ын Парламентын Ассамблейн намрын хурал манай улсад болов.
Монгол Улсын Их Хурал Европын аюулгүй байдал, хамтын ажиллагааны байгууллагын Парламентын Ассамблейн 2015 оны намрын хурлыг Монгол Улсын нийслэл Улаанбаатар хотноо энэ оны 09 дүгээр сарын 15-наас 18-ны өдрүүдэд зохион байгууллаа. Тус хуралд ОХУ-ын Төрийн Думын дарга Сергей Евгеньевич Нарышкин, ЕАБХАБ-ын Парламентын Ассамблейн Ерөнхийлөгч Илкка Канерва тэргүүтэй гадны зочид төлөөлөгчид оролцсон юм.
Европын аюулгүй байдал, хамтын ажиллагааны байгууллагын Парламентын Ассамблейн 2015 оны намрын хурал “ЕАБХАБ-ын бүс нутаг болон олон улсын түвшин дэх аюулгүй байдлын сорилт бэрхшээлүүдийг хэлэлцэх нь: бүс нутгийн хамтын ажиллагааг бэхжүүлэхэд парламентчдын гүйцэтгэх үүрэг” сэдвийн дор явагдсан ба Хуралдаан 1, 2, 3 болон Нээлттэй хэлэлцүүлгээр үргэлжилсэн юм.
2015.09.16. Хуралдаан 1 нь “Бүс нутгийн аюулгүй байдал, терроризм, хүний наймаатай тэмцэх: ЕАБХАБ-ын үүрэг оролцоо ба бүс нутгийн хамтын ажиллагаа”, мөн өдөр Хуралдаан 2 нь “Бүс нутагт тулгараад буй эдийн засгийн сорилт бэрхшээлүүд, хүнсний аюулгүй байдал, гамшгийн эрсдэлийг бууруулах ба усны менежмент: олон улсын байгууллагуудтай хамтран ажиллах нь” сэдвийн дор тус тус болсон юм. 2015.09.17-ны үдээс өмнө Байнгын хорооны хурал болж, “Ардчилсан институциуд, хүний эрх, хэвлэл мэдээллийн эрх чөлөө, шашин шүтэх эрх чөлөө, хүйсийн эрх тэгш байдлын хөгжил” сэдвээр Хуралдаан 3 үргэлжилсэн юм. Нээлттэй хэлэлцүүлгийн дараа Хаалтын ажиллагаа болж, Монгол Улсын Их Хурлын гишүүн, УИХ дахь Монгол-ЕАБХАБ-ын ПА-тай харилцах бүлгийн гишүүн Н.Энхболд хаалтын үгийг хүргэснээр ЕАБХАБ-ын Парламентын Ассамблейн 2015 оны намрын хурал өндөрлөлөө.
ИЗНН-аас дэд сайдад З.Ган-Очир болон Р.Булгамаа нар нэр дэвших болов
Өнгөрсөн долоо хоногт зургаан сайдыг үүрэгт ажилд нь томилсон. Одоо дэд сайдуудад хэнийг томилохыг олон нийт анхааралтай ажиглаж байна. Уг нь өнгөрсөн даваа гарагт дэд сайдуудыг томилох эсэхийг хэлэлцэх байсан боловч намууд дэд сайдад нэр дэвшигчээ тодруулж амжаагүй учраас түр хойшлоод байгаа. Одоогийн байдлаар АН-ынхан дэд сайдад нэр дэвшигчдээ тодруулсан. Тодруулбал, намын дарга З.Энхболд дарга Гүйцэтгэх зөвлөлд таван хүний нэр оруулснаас Н.Мөнхдаш, Д.Цэрэнчимэг, Ч.Батцогт нарыг дэд сайд болгох нь зүйтэй гэж дэмжсэн юм.
Тэгвэл дэд сайд нарын нийт долоон суудлаас АН гурав, "Шударга ёс" эвсэл хоёр, ИЗНН хоёр суудал авах нь тодорхой болсон. Энэ дагуу өнгөрсөн долоо хоногт ИЗНН-ын улстөрийн зөвлөл хуралдав. Тодруулбал, Уул уурхайн дэд сайдаар өөр нэр дэвшигч байгаагүй тул ИЗНН-аас нэр дэвшигч З.Ган-Очир 100 хувийн саналаар гарав.
Харин Боловсрол, соёл, шинжлэх ухааны яамны дэд сайдад "Русская гимназия" сургуулийн захирал н.Энхтайван, "Энх орчлон" сургуулийн захирал н.Базар, ИЗИС-ийн дэд захирал, ИЗНН-ын Төрийн байгуулалт Хууль зүйн Бодлогын асуудал хариуцсан Нарийн бичгийн дарга Р.Булгамаа нар нэр дэвшиж 70 хувийн саналаар Р.Булгамаа БСШУЯ-ны дэд сайдад нэр дэвших нь тодорхой боллоо.
Г.Ган
