МАН-ын гишүүн У.Хүрэлсүхийг намаасаа гарах нь гэсэн мэдээлэл сүүлийн үед хэвлэлээр гарах болсон. Энэ асуудлаар түүнээс авсан тодруулгыг хүргэж байна.
-Сүүлийн үед МАН дотроо эв нэгдэлгүй хагарч байна, МАН-ын дарга М.Энхболд та хоёрыг ойлголцохоо больсон гэж хэвлэл мэдээллийн хэрэгслээр бичих боллоо. Үүнд та ямар хариулт өгөх вэ?
-Ардын намыг эв түнжингүй байгаасай, хагарч бутраасай гэж хүсч мөрөөдөж буй хүмүүс байхыг үгүйсгэхгүй. Тэдний хүссэнээр Ардын нам хагарч бутраад байдаг улс төрийн хүчин биш. Энэ нам олон бэрхшээл, сорилтыг даван туулж ирсэн түүхтэй нам. М.Энхболд дарга бид хоёрын хувьд хар багаасаа үерхэж нөхөрлөсөн хүмүүс. Нэг завинд хамт яваа гэдгээ бид дэндүү сайн мэднэ.
-Таныг МАН-аас гарч шинэ нам байгуулахаар ажиллаж байгаа гэсэн. Энэ үнэн үү?
-Би одоогоос 22 жилийн өмнө анд нөхдийнхөө өмнө нэг тангараг өргөсөн юм. Энийг манай намын нөхдүүд сайн мэднэ дээ. Тэр юу вэ гэвэл, элссэн намаасаа гарахгүй, авсан эхнэрээ хаяхгүй, анд нөхдөөсөө урвахгүй гэж. Энэ бол миний амьдралын зарчим. Тэр тусмаа Их жанжин Сүхбаатар, анхны долоогийн байгуулсан Ардын намаасаа урвана гэж үү.
