Засгийн газрын ээлжит бус хуралдаанаар яамдын дэд сайд, төрийн нарийн бичгийн дарга нарыг томиллоо. Парламентад суудалтай  намууд зөвшилцөн оногдсон яамандаа хүмүүсээ томилуулахаар санал болгосны дагуу тахимын гишүүд дэмжиж баталжээ.  АН-аас Сангийн дэд сайдаар С.Пүрэв, Батлан хамгаалахын дэд сайдаар А.Баттөр, Барилга хот байгуулалтын дэд сайдаар Г.Байгалмаа, Зам тээврийн дэд сайдаар Х.Ержан нарыг улираан томилсон бөгөөд Эрчим хүчний дэд сайдаар Сонгинохайрхан дүүргийн АН-ын дарга Ө.Пүрэвбат, Эрүүл мэнд спортын  яаманд Спорт хариуцсан дэд сайдаар Т.Болбаатар нар шинээр томилогдов.

МАН-аас Аж үйлдвэрийн дэд сайдаар УИХ дахь МАН-ын бүлгийн зөвлөх Х.Баделхан, Боловсрол соёл шинжлэх ухааны дэд сайдаар Стратеги академийн захирал Я.Төмөрбаатар, Гадаад хэргийн дэд сайдаар Хятад улсад худалдааны төлөөлөгчөөр ажиллаж байсан Н.Оюундарь, Эрүүл мэнд, спортын яаманд Эрүүл мэнд хариуцсан дэд сайдаар Нийслэлийн эрүүл мэндийн дэд дарга Д.Атармаа, Уул уурхайн дэд сайдаар Оюутолгойн ТУЗ-ийн гишүүн Г.Тэмүүлэн, Хүн амын хөгжил, нийгмийн хамгааллын дэд сайдаар  Нийслэлийн засаг даргын орлогч асан Б.Мөнхбаатар,  Хүнс, хөдөө аж ахуйн дэд сайдаар Баянзүрх дүүргийн Засаг дарга асан Б.Батзориг нарыг томилсон байна. Б.Мөнхбаатарын хувьд урьд нь мөн  Баянзүрх дүүргийн Засаг даргаар ажиллаж байсан юм.

“Шударгаёс” эвслээс Хууль зүйн дэд сайдаар МАХН-ын Ц.Уугангэрэлийг томилов.  Хөдөлмөрийн дэд сайдаар З.Батбаярыг нэр дэвшүүлсэн  бөгөөд МҮАН-тай зөвшилцсөнөөр эцэслэн шийдвэрлэв. Байгаль орчин, ногоон хөгжлийн дэд сайдаар “Нар Мон” компанийн захирал М.Хүрэлсүхийг томилсон байна.

Боловсрол, соёл, шинжлэх ухааны яам, Эрүүл, мэнд спортын яам нь тус бүр хоёр дэд сайдтай болж байгаа бөгөөд  Боловсрол, соёл, шинжлэх ухааны дэд сайдаар МАХН-аас Н.Энхбаярын туслахаар ажиллаж байсан Б.Тулгыг томилжээ.

Засгийн газрын хуралдаанаас 9 яамныТөрийн нарийн бичгийн даргыг үүрэгт ажлаас нь чөлөөлж, тэдний 4-ийг нь эргүүлэн шинээр байгуулагдсан яамных нь Төрийн нарийн бичгийн даргаар томилох шийдвэр гаргалаа. Тодруулбал, Гадаадхэргийняам, Боловсрол соёл шинжлэх ухааны яам, Барилга хот байгуулалтын яам, Эрчимхүчнийяам, Соёл, спорт, аялал жуулчлалын яам /татан буугдсан/, Үйлдвэр хөдөө аж ахуйн яам /татан буугдсан/, Хөдөлмөрийн яам, Эрүүл мэндийн яамныТөрийн нарийн бичгийн даргыг үүрэг ажлаас нь чөлөөллөө. Харин Гадаад хэргийн яамны Төрийн нарийн бичгийн даргаар Б.Болдбаатар,  Боловсрол соёл шинжлэх ухааны яамны Төрийн нарийн бичгийн даргаар Ш.Булга-Эрдэнэ, Эрчим хүчний яамны Төрийн нарийн бичгийн даргаар Д.Дэлгэрцогт, Барилга хот байгуулалтын яамны төрийн нарийн бичгийн даргаар Б.Эрдэнэбүрэн нарыг дахин томилсон байна. Эрчим хүчний яамны төрийн нарийн бичгийн Д.Дэлгэрцогт нь “Шударга ёс” эвсэлийнх юм. Тийм учраас эвслээс томилогдох Төрийн нарийн бичгийн даргын квот нэгээр хасагдаж байна. Байгаль орчин, ногоон хөгжил, аялал жуулчлалын яам,  Хөдөлмөрийн яам, Эрүүл мэнд, спортын яам, Хүнс хөдөө аж ахуйн яамныТөрийн нарийн бичгийн дарга нарыг МАН-аас санал ирүүлж, томилох бололтой.

Б.Баяр

Эх сурвалж: Tumen.mn