Ерөнхий сайд Ч.Сайханбилэг хаврын чуулганы нээлтийн өмнөх өдөр ард түмэндээ хандаж үг хэлэхдээ "Энэ зун дэлхийн том одын тоглолтыг Монголд зохион байгуулахыг амлаж байна.Дэлхийн одын тоглолтыг эх орондоо үзэх нь ээ залуучуудаа" хэмээн дурдсан.
Тэрбээр хэлсэн үгэндээ хүрч дэлхийн супер оддыг эх орондоо авчирж ирэх асуудлыг аль хэдийн хөөцөлдөж эхэлсэн байна. Одоогийн байдлаар дуучин, жүжигчин Женнифер Лопез Монголд ирж магадгүй гэх мэдээлэл байгаа. Олон нийтийн цахим сүлжээнийхэн уг асуудлаар хүчтэй хэлэлцүүлэг явуулж байгаа бөгөөд ихэнх нь дургүйцэж байгаа юм. Учир нь эдийн засаг хямарсан хүнд хэцүү үед дэлхийн хэмжээний одыг их мөнгө зарлагадаж авчрах нь тохиромжгүй гэж үзэж байгаа аж. Ядаж л өнөө, маргаашгүй хальж, нийслэлчүүдийг усгүй болгох гэж буй Төв цэвэрлэх байгууламжаа энэ мөнгөөр засах хэрэгтэй гэж байгаа юм.
Бидний авч буй мэдээллээр Женнифер Лопезийг 1 тэрбум 500 сая төгрөгөөр авчрах аж. Хэрвээ тэр ирвэл Чингисийн талбайд тоглолтоо хийнэ. Олон нийт түүнийг ирнэ, ирэхгүй хэмээн шуугиж байгаа ч албаныхан одоог хүртэл уг асуудлаар ам нээгээгүй байна.
Бүгд л "Энэ талаар мэдээлэлгүй байна. Тодорхой болоогүй" гэх мэт хариуг хэлж байгаа юм. Өчигдөр наадмын комисс хуралдаж уг асуудлаар өнгөц тайлбар өгсөн нь "Уг асуудал тодорхой болоогүй байгаа. Тодорхой болбол Ерөнхий сайд өөрөө мэдээлэл хийнэ" гэсэн хариулт байлаа.
Тэгвэл Үндэсний их баяр наадмыг зохион байгуулах комиссын Урлаг, соёлын салбар хорооны даргаар ажиллаж буй Ч.Төмөрбаатар уг асуудлаар мэдээлэл өгсөн байна.
Тэрбээр "Женнифер Лопезийг урьсан нь үнэн. Гэхдээ энэ асуудал эцэслэн шийдэгдээгүй байна.Гэрээ, хэлэлцээрийн түвшинд явж байгаа учраас мэдээлэл өгөхгүй боломжгүй" гэжээ.
Үүнээс үзвэл Холливүүдийн алдарт жүжигчин, дуучин наадмын үеэр Монголд ирэх нь тодорхой байна.
Дашрамд дурдахад, түүнээс өмнө дуучин Бэйонсиг урьсан ч хэт өндөр үнийг санал болгосон учраас манайх татгалзсан байна. Түүний хувьд Монгол мөнгөөр 3 тэрбум орчим үнээр тоглодог аж. Холливүүдийн алдарт одод олон саяын өртгөөр ирж, буух буудал, дуулах тайзандаа өндөр шалгуур тавьдаг билээ.
Т.Энхэлээ
