“MCS” групп Монголын бахархалтай бүтээн байгуулагч, өөрийн гэсэн түүхтэй үндэсний том компани. Бараг цор ганцаараа шүү. Энэ бол үнэн. Харин сүүлийн арваад жилд хэтэрхий улайрч гадныхантай хамтран үндэсний үйлдвэрлэгчдээ гишгэчих болсон нь бас үнэн. Энэ хугацаанд тэд Монголын төрд эрхэлж, улстөрчдийг нь эрхлүүлж санасан бүхэндээ хүрч, сарвайсан бүхнээ авлаа. Гандан буурахгүйгээр ноёрхлоо тогтоосных нь гол нууц нь улс төрийн “хамгийн том” гэх хоёр хүчнээс түүвэрлэн “групптээ элсүүлсэн” байдагт оршино. “Фэйсбүүкийн элий” гэгдэх хүүхдүүд хүртэл групптээ элсүүлэх гэдгийн учрыг ойлгоно. Ингээд УИХ дахь эрх мэдлийн олонлогоо турхирчихаад “цэвэрхэнээр” бизнесээ хийгээд бүтээн байгуулалт, гоё сайхан ажлаа хийгээд явж байна.
Утаагүй зуух, нүүрснээс шингэрүүлсэн хий гаргаж авах төсөл, эрчим хүч, уул уурхай, дэд бүтэц гээд том, жижиг гэлтгүй шунаж ч, авч ч чадсан “MCS” группийн хамгийн сүүлийн “сюрпризит гамшиг” нь тус группийн “эвэр, сүүл”-ийн аль нэг нь болон дагалддаг “Керри” группийн хөрөнгө оруулалттай “Шангри Ла” зочид буудлын нээлтийн ажиллагаа байлаа. Мэдээлэх тусам оруулсан гэх хөрөнгө оруулалтын хэмжээ нь бодитой бусаар өсөн нэмэгдсээр байгаа энэ алдартай зочид буудлын сүлжээ нийслэлийн мянга гаруй “одгүй” зочид буудал, 60 хүрэхгүй “одтой” зочид буудлынхныг сөхрүүлэх нь тодорхой. Тиймээс ч гэнэтхэн зочид буудлуудаа дэмжиж 150 тэрбум төгрөгөөр засварлана, 197 тэрбумын хөнгөлөлттэй зээл олгоно гэхчлэн “зочид буудлуудаа хайрлан хамгаалж” эхлэвэй.
Уран арга байгаа биз. Гол халхавч нь “Цаана чинь АСЕМ айсуй”. Гэвч АСЕМ-ын уулзалт дуусна. Тэгээд ч дараагийн парламентын үед ирэх биз. Магадгүй, тэр үед урьсан эзэн болох Ерөнхийлөгч маань ч солигдсон байж мэдэх. Үгүй дээ л эх орондоо томчуудыг урьсан түүхэн гавьяатайгаар ажлаа өгнө.
Одоо “MCS” ба “Керри” нэгдлийн шинэ зуушны “хийц”-ийг нь харъя. “Шангри Ла”-тай болчихоор монголчууд баярлах ёстой юм. Даанч ядуус нь олон болохоор атаархаад баярлаж өгөхгүй байгаа нь харамсалтай. Та бүхэн санаж байгаа бол Оюутолгойн гэрээг зурсан чинь LV орж ирээд л манай улсын нэр хүнд дэлхий дахин тавцан дээр нэг их өссөн юм гэдэг “хошин яриа” байдаг. Хэн зохиосон нь тодорхой. Дараа нь Монголд “Bank of China” салбараа нээчихвэл энэ том банктай харилцагч бүхэн хишиг хүртээгээд буцна гэдэг үлгэр ярьсаар намжсан. Гэхдээ амь бөхтэй байгаа нь тодорхой, наадмаар анхааралтай байгаарай гэж сануулъя.
Цаашилбал, алдарт Тавантолгойн хөрөнгө оруулагч “Энержи ресурс” өөрөө “Керри”-гийн аманд багтчихаад байгаа нь улстөрчдийг талцуулсаар байгаа. Угаас тэдэнд улстөрчид талцах, иргэн ядуурах аль нь ч хамаагүй. Бүгд “MCS”, “Керри”-ийн өмч л болох нь чухал. Тиймээс ч “Юун Засгийн газрын тогтоол, УИХ-ын тогтоол, хууль, ҮАБЗ-ийн зөвлөмж вэ, өөрчлөөч, цуцлаач” гэсэн шахалт үзүүлэн “хуваагдах тусмаа сайн” гэх Хятад арга, авлигын аргаар юуг ч хийж болдог “сингапур туршлагаараа” ажиллаж байгаа нь энэ. Болдогсон бол тэдэнд Монголыг бэлэглэчих юмсан. Даанч тэд авахгүй л дээ. Учир нь ашиггүй маш олон зүйл ашигтайгаа дагаад ирэх учраас....
Г.Чинзориг
Zaluu.com
