Хүний эрхийн зөрчил Монголд түгээмэл хандлагатай болж буй аж. Ялангуяа цагдан хорих ангиудад урьдчилан  хоригдож байгаа хүмүүст  ийм зөрчил нэлээд  тохиолддог болжээ. Мөн хэрэг бүртгэх, мөрдөн шалгах ажиллагааны явцад ч мөрдөн байцаагч нар  хүний эрхийг  зөрчиж байна. Саяхан Хүний эрхийн үндэсний комиссоос 445 сэжигтэн, яллагдагч нарын дунд санал асуулгын судалгаа явуулжээ. Тэдгээр хүмүүс “Таны гомдолыг хугацаанд нь шийдсэн үү” гэсэн асуултанд  13 хувь нь “Тийм”, 47 хувь нь “шийдвэрлээгүй”, 39 хувь нь “Ямар нэгэн хариу өгөөгүй” гэж хариулжээ. Түүнчлэн энэ судалгаанд оролцогчдын  зарим нь “Хэргийн материалтай танилцуулаагүй,  шүүх, прокурорын зөвшөөрөлгүйгээр цагдан хорьсон” гэжээ.  Өчигдөр УИХ-ын Хүний эрхийн дэд хорооны хуралдаанаар ШШГЕГ-ын харъяа Цагдан хорих 461 дүгээр ангид хийсэн шалгалтын дүнг хэлэлцэх үеэр ч мөн энэ талаар гишүүд хатуу шүүмжиллээ. Гэтэл прокурорын байгууллагаас ирж оролцсон ажилтнууд Хүний эрхийн үндэсний комиссын хийсэн шалгалтын ажлын дүн болон дээрх судалгааны материалыг үгүйсгэх хандлагатай байв. Харин  Хүний эрхийн үндэсний комиссын дарга Ж.Бямбадорж “Хүний эрхийн үндэсний комисс дүгнэлтээ нотлох албагүй. Байгаа байдлыг нь л гаргаж ирсэн. Хийсэн хяналтын ажилдаа эзэн болно” гэсэн хариу барив.

Б.Баяр 

Эх сурвалж: Tumen.mn