МУГЖ, дуучин С.Жавхлан өнгөрөгч 2012 оны сонгуульд төрсөн нутаг Увсдаа нэр дэвшин өрсөлдөөд унаж, тэр цагаас хойш алгуурхан улстөр хийсээр өнөөдөртэй золгосон билээ. Тиймээс 2015 он гарсан цагаас хойш түүний улстөрийн үйл ажиллагаа идэвхжин сэргэж байна. Тэмцэл өрнүүлж буй бүхэнд хөндлөнгөөс болон шууд утгаараа оролцохоос эхлээд олон ажил өрнүүлж буй.
Тэгвэл тэрээр МҮОНТ-ээр олон нийтийн өмнө Ерөнхийлөгч болон УИХ-ын 76 гишүүнтэй нээлттэй ярилцахаар цаг хүссэнийг МҮОНРТ-ийн удирдлага хүлээн авч өнөөдөр буюу гуравдугаар сарын 11-ний 21 цагт боломж олгожээ. Гачлантай нь С.Жавхлантай нээлттэй ярилцахаар хүрэлцэн очих гишүүн яаж ч бодсон байхгүй л дээ. Нэг дуучинтай ярилцана гээд бөөн бөөнөөрөө явж байдаг ажлаа алдсан ямар гишүүн байхав дээ. Тэгэж доошоо орох түшээ ч гэж юу байлаа. Энэ бол зүгээр л шоу. С.Жавхлан ч үүнийг сайтар мэдэж байгаа болов уу.
Мэдсэн хэдий ч сенсааци тарьж нийгмийн анхааралд байх нь түүнд юу юунаас чухал байгаа. Магадгүй, үүний дараа 76 гишүүн болон Ерөнхийлөгч надаас айгаад ирээгүй гэх сенсааци дэгдээж таарна.
Ер нь бол дуулдаг нь дуулдгаараа, худалдаа хийдэг нь хийдгээрээ, улстөрөө явуулдаг нь түүнийгээ хийгээд явахад л нийгмийн хөгжил аяндаа бүрдэх онол ч бий, практик ч бий. Түүнээс бус нэг дуучин ч улстөрлүү хальтирч донгодоод, нэг бөх нь ч улстөр лүү барьц сонгон дайраад, бизнес хийдэг нь мөнгөө бариад чичрээд байхаар л утга учраа алдаж нийгмийн хөгжил чөдөрлөгдөх нэг шалтгаан болж байгаа юм шүү дээ. Өөрт оногдсон ажлаа сайн хийгээд явбал болох нь тэр.
Харин С.Жавхлангийн энэ саналыг ганцхан гишүүн дэмжсэн нь Г.Уянга.
Тэрээр өөрийн цахим хуудаснаа жиргэхдээ “С.Жавхлангийн хүсэлтийг МҮОНТ хүлээн авсан байна лээ. Тэрээр 76 гишүүн болон Ерөнхийлөгчтэй нээлттэй ярилцана. Намайг оролцоно биз дээ гэж байна. Дэмжүүштэй сайхан санал байна. Би ч яахав, оролцох болно. Харин хэдэн хүн ирэх юм бол доо? Харганын ноосыг нэг өдрийн дотор цуглуулж эсгий хийхээр оролдоод үзэх үү? Бид ч ийм ярилцлагыг зөндөө л хүсч байсан, ирдэг хүн гэж нэг ч байгаагүй. Харин сүүлийн үед зурагтаар 25 жилийн өмнөх тэмцлийн үеийн дүрс бичлэг гарч байна билээ. Өнөөдрийн эрх баригчдыг гудамжны тэмцэгч байхад тэр үеийн эрх баригчид, Ерөнхий сайд нь хүрч ирээд л олон нийтийнхээ өмнө зурагтаар ярилцаж л байсан байна билээ. Одоо ийм хүнийг өдрөөр дэн бариад хайсан ч олохгүй биз дээ. Монгол улс түүхэндээ энэ 77 хүнийг нэг дор цуглуулж байгаагүй байхаа даа…? Тангараг өргөхдөө ч ийм бүрэлдэхүүнтэй байхаа хэдийн больсон шүү дээ, энэ төр?!” хэмээн зовлон үзсэн хүний хувиар жиргэсэн байна лээ.
Н.Дөл
Эх сурвалж: Unen.mn
