Монгол Улсын иргэн, “лайвчин” Д.Мөнх-Эрдэнэ хорих ангиас суллагдаж “шүгэлээ үлээж” эхэллээ. Энэ удаад түүний “шүглээс” нэг л өөр “авиа” гарав. Тэр яагаад УБТЗ руу дайрав гэдгийг эргэцүүлж суутал өнгөрсөн зун түүний аав Даваа, УБТЗ-ийн ҮЭХ-ны дарга Б.Баяраа нарыг нэг өдөр, цаг мөчид “Гавьяат” цолоор тухайн үед салбарын сайдаар ажиллаж байсан Л.Халтар шагнаж зогссон нь санаанд оров. Л.Халтар бол экс Ерөнхийлөгч Х.Баттулгын “хайртай” сайд нарын нэг байсан юм. Үүнийг ч хойш тавья. Одоогоор Д.Мөнх-Эрдэнийн хоригдсон шалтгаан буюу түүнд холбогдох хэрэг нь авлига өгсөн, албан тушаалын эрх мэдлээ урвуулан ашигласан хоёр үйлдэлтэй БОАЖЯ, Богдхан уулын дархан цаазат газрын хоёр албан хаагчийн хамт шүүхэд шилжиж байгаа юм билээ. Гэтэл түүнээс ч ноцтой хоёр улсын харилцаатай холбоотой “контрбанд”-ын хэрэг, түүнд холбогдох урд хөршид хоригдож буй нэр бүхий иргэдийн хэрэг бий. Энэ хэрэг тун удахгүй шийдэгдэх гэж буй. Хамгийн гол нь энэ хэргийн холбогдогч буюу Д.Мөнх-Эрдэнийн хамсаатнаас Монгол Улсын Ерөнхийлөгч асан Х.Баттулга яагаад Монгол Улсын иргэншил олгох зарлигаа “харамлаагүй” нь “шүгэл үлээгч”-ийн маань шүглийн дуу бүхнээс сонсдож, үнэртдэг юм даа.
Иргэн Д.Мөнх-Эрдэнэд холбогдох хэргийг Хятадын тал нэхэмжилсээр байна
Д.Мөнх-Эрдэнэ 2016-2019 онд Монгол Улсаа төлөөлж Хөх хот дахь Ерөнхий консулаар ажилласан. Үндэсний аудитын хорооноос түүнийг байрны түрээс, хүүхдийн сургалтын төлбөр, гэрээт орчуулагч хөлсөлсөн, дипломатчдыг галт тэргээр биш онгоцоор Монгол руу буцаасан гэх зөрчлүүдийг нь шалтгаанаар зөрчил илрүүлж байснаас хойш удалгүй эгүүлэн татсан байдаг.
Энэ цаг мөчөөс хойш Д.Мөнх-Эрдэнийн тухай сонирхолтой бичгүүд манай улсын тухайн үеийн Гадаад харилцааны сайд, улмаар Монгол Улсын Ерөнхийлөгчид дараалан хүргэгдсэн байдаг юм. Агуулгын хувьд мэдээж ижил. Товчхондоо “Монгол Улсын иргэн Ц.Оюун-Эрдэнийн нөхөр, БНХАУ-ын иргэн Вао Чин Сун гэгч нь 2017 оны хавар ӨМӨЗО-ны иргэн Батугаас А395NH дугаартай Mersedes Benz G63 маркийн суудлын автомашиныг худалдан авахаар болж хавар нь урьдчилгаа мөнгөө өгөөд намар нь худалдаж авсан аж. Уг автомашиныг Монгол Улсаас ӨМӨЗО-ны Хөх хотод суугаа Ерөнхий консул /тухайн үеийнхээр/ Д.Мөнх-Эрдэнэ, Бату нар Хятад улсын хилээр нэвтрүүлсэн нь татвараас зугтсан хууль бус ажиллагаа байсан гэж Хятадын хуулийн байгууллагууд үзжээ. Мөн Д.Мөнх-Эрдэнэ нар нь тус улсын хилээр 6-7 автомашин оруулж зарсан гэх мэдээлэл удаа дараа Монголын хэвлэл мэдээллийн хэрэгслээр нийтлэгдсэн боловч дорвитой арга хэмжээ авсангүй. Эдгээр машиныг ямар хөрөнгийн эх үүсвэрээр авсан, хэрхэн үгсэн хуйвалдсан болон дипломат албаны нэр хүндийг унагаж хоёр улсын харилцаанд сөргөөр нөлөөлж болзошгүй зэргийг яаралтай шалгаж өгнө үү” гэсэн агуулгатай.
Энэ бичиг Монгол Улсын Гадаад харилцааны сайд болон Монгол Улсын Ерөнхийлөгчид 2019 оны 4 дүгээр сарын 19-ний өдөр хүргэгдсэн. Ноцтой нь БНХАУ-ын Гадаад хэргийн яамнаас Монгол Улсаас БНХАУ-д суугаа ЭСЯ-нд 2019 оны 5 дугаар сарын 17-ны өдөр Хятадын Гаалийн ерөнхий газрын Контрбандтай тэмцэх газраас чухам ямар хэргүүдэд холбогдуулан мөрдөн шалгах болсноо илэрхийлж дэмжлэг үзүүлж хамтран ажиллахыг хүссэн албан бичиг ирүүлсэн нь энд байна.
Хятадад улсад гэмт хэрэгт холбогдсон иргэн Монгол Улсын харьятат болох ийм амархан гэж үү?
Гэтэл Д.Мөнх-Эрдэнийн энэ хэрэгт холбогдсон Бату гэгч буюу БНХАУ-ын иргэн Зодовзав овогтой Үнэнбат нь 2021 оны 3 дугаар сарын 31-ний өдөр тухайн үеийн Монгол Улсын Ерөнхийлөгч Х.Баттулгад Монгол Улсын харьяат болох хүсэлтээ гаргасан нь энэ!
Хамгийн сонирхолтой нь тухайн үеийн Монгол Улсын Ерөнхийлөгч Х.Баттулга ердөө хоёр сар гаруйхны дотор буюу 2021 оны 6 дугаар сарын 21-ний 177 дугаар зарлигаараа Монгол Улсын харьяат болохыг нь зөвшөөрснөөр Д.Мөнх-Эрдэнийн хамсаатан буюу нэг хэрэгт хамт холбогдсон Бату буюу БНХАУ-ын иргэн Зодовзавын Үнэнбат нь Монгол Улсын иргэн Зодовзавын Бат болсон байгаа юм.
Ерөнхийлөгч асан Х.Баттулга У.Хүрэлсүхийг тангараг өргөхөөс 4-хөн хоногийн өмнө Батуг Монголын харьяат болгох зарлиг гаргажээ!
Дашрамд сануулахад Ерөнхийлөгчийн сонгуульд У.Хүрэлсүх 2021 оны 6 дугаар сарын 10-нд ялж, Ерөнхийлөгчийн тангарагийг 2021 оны 6 дугаар сарын 25-нд өргөсөн. Батуг Монголын иргэн болгох зарлиг үүнээс 4-хөн хоногийн өмнө гарчээ. Харин Д.Мөнх-Эрдэнэ нутаг нэгт экс Ерөнхийлөгчид юу амласан учраас хамсаатанаа Монголын иргэн болгох зарлигийг гаргуулж чадсан бол гэдэг сонин.
Одоо тэрбээр энэ нэрээрээ ХУД-ийн 11-р хороо, Сөүл Рояал Коунти хотхонд амьдарч байна. Оршин суугаа хаяг, унадаг машин, барьдаг утасных нь дугаар бүгд азынх, тэр үнэхээр азтай хүн юм.
Энэ бүхний эцэст юу гэж хэлэх гэсэн бэ гэвэл түүнийг Монгол Улсын иргэн болгох зарлиг гаргахын өмнө хүсэлтийг нь хянаж судлах явцад холбогдох хууль, хяналтын байгууллагууд гэмт хэрэгт холбогдсон эсэхийг нь мэдээгүй гэж үү? Монгол Улсын Ерөнхийлөгч асан Х.Баттулгыг ийм түргэн хугацаанд иргэншил олгоход нь нөлөөлсөн ямар шалтгаан байсан бол? Яагаад Д.Мөнх-Эрдэнэ жагсаал цуглаанд оролцох гэж очоод хөөгдөж, Ерөнхийлөгч асан Х.Баттулгын төлөө яахаас ч буцахгүй авирлаж Гаалийн ерөнхий газрын дарга асан Б.Асралт, зөрчлийг нь илрүүлж байсан Үндэсний аудитын газрын дарга Б.Занданбат, ГХЯ-ны Төрийн нарийн бичгийн дарга Н.Анхбаяр нарын өрөөнд дайрч орж гүтгэн доромжилж байв? Одоо яагаад “УБТЗ” ХНН-ийн орлогч дарга эмэгтэйн талаар гүтгэн доромжилж хашгирах болов? Үүний цаана хэн байгааг олон нийт хэдийнэ цээжээр мэддэг болжээ. Ардчилал, үзэл бодлоо илэрхийлж үгээ хэлэх эрх бидний хайрлан дээдлэх тэргүүн эрх мөн. Үүнтэй хамт хувь хүний нэр хүндийн халдашгүй эрх зөрчигдөх ёсгүй. Д.Мөнх-Эрдэнэ гэдэг иргэн бусад бүх иргэний адил хуулийн дор амьдрах ёстой. Түүнд ч, хэнд ч бусдаас илүүгээр эдлэх эрх гэж үгүй.
Нийтлэлч: У.Оргилмаа
