Энэ удаагийн УИХ-ын сонгуульд урлаг соёлынхноос эхлээд спортынхон ихээр нэр дэвших болсон. Энэ нь нийгэмд янз бүрийн хэл ам гарахад нөлөөлж байгаа ч нөгөөтэйгүүр урлаг спортынхноо дэмжих иргэд цөөнгүй байгаа.

Тухайлбал, дуучин М.Нарантуяаг ганц бие ээжүүдээс эхлээд эмэгтэйчүүд дэмжиж, идэвхтэй хамтран ажиллаж байгаа энэ үед Ганбууш буюу Н.Ган-Од Нарагийн эсрэг дуугарч олныг гайхшруулав.

Тэрбээр энэхүү бичлэгээрээ Наратай дайн зарлаж буйгаа илтгэж "Өөрийн хайраа хөөж явуулжчихаад, өрөөлөөс хүүхэдтэй болчихоод өрх толгойлсон эмэгтэйчүүдийн өмнөөс үг хэлэх эрх чамд ер нь байгаа юм уу. Өрөөлийн зовлонг өөртөө оноо болгож, өрөвдүүлэх хэв маяг чинь хэрээс хэтэрч байгаа юм биш үү?. Өнөөдрийн амьдрал чинь тэр чигтээ жүжиг. Өнгө, мөнгө, брэнд гурвын хойноос нүдээ ухаж гүйж байж  өрх толгойлсон ээжүүдийн амьдралыг чи мэдэх юм уу?.  Нэр цэвэр хүн нэр дэвших нь төр цэвэр байхын үндэс. Төрийн суудалд улайран зүтгэж байгаа чамайг татвар төлөх гээд оочирлож байгаа гэдэгт би лав итгэхгүй. Төрийн минь босгыг намхан гэж бүү горьд. Чамайг төр түшилцвэл согтуу самурай төрийн минь дээр сандайлна.  Монголын төрд хэн дуртай болгон нь шургаж ордог цаг ирсэн юм бол 2017 оны Ерөнхийлөгчийн сонгуульд би өрсөлдье" хэмээжээ.