ЭХЭМҮТ-ийн Тандалт судалгааны албанаас “Жирэмсэнтэй хавсарсан эрхтэн тогтолцооны эмгэг” сэдэвт цахим хурлыг 2022 оны 03 дугаар сарын 31-нд зохион байгуулав.
Цахим хурлыг ЭХЭМҮТ-ийн ерөнхий захирал Ш.Алтантуяа удирдан явууллаа.
Уг хуралд ЭХЭМҮТ-ийн удирдлага, эх барих эмэгтэйчүүдийн зөвлөх эмч нар, СМЗТ, ТСА-ны эмч нар, ЭСҮТ-ийн төлөөлөл, Өргөө, Хүрээ, Амгалан амаржих газар, ЭНЭҮТ II, УГТЭ, Баянзүрх, Багануур, Хан-Уул ЭМТ, 19 аймгийн ЭМГ-ын удирдлага, эх барих, эмэгтэйчүүдийн асуудал хариуцсан мэргэжилтэн, зөвлөх эмч, аймгийн нэгдсэн эмнэлэг, БОЭТ-ийн удирдлага, ЭМТҮЧАБА-ны дарга, менежер, эх барих эмэгтэйчүүдийн эмч, зарим сумдын эмч нар бүхий 144 эмч, мэргэжилтэн танхим болон цахимаар оролцлоо.
Хөвсгөл аймгийн ЭМГ-ын ЭТҮХ-ийн дарга М.Энхдалай “Тохиолдолд суурилсан сургамж, дүгнэлт” сэдвээр, ЭХЭМҮТ-ийн НҮЗП-ийн дотрын эмч Ж.Сугир “Хавдар ба жирэмсэн” сэдвээр онолын мэдээлэл танилцуулав. Тохиолдолд суурилсан сургамж, дүгнэлттэй уялдуулан ЭХЭМҮТ-ийн ерөнхий захирал Ш.Алтантуяа, дэд захирал Х.Цолмон, зөвлөх эмч С. Амармандах, Ч.Мөнхбаяр нарын сонирхсон асуултад Хөвсгөл аймгийн ЭМГ-ын ЭТҮХ-ийн дарга М.Энхдалай, эх барих эмэгтэйчүүдийн зөвлөх эмч Р.Отгонбаяр нар хариулт өглөө. ЭХЭМҮТ-ийн зөвлөх эмч Н.Дашзэвэг ЭХЭМҮТ-ийн ТСА-наас улирал бүр эхийн, ноцтой хүндрэл, эндэгдлээс сэргийлэхэд чиглэгдсэн сэдэвчилсэн цахим хурлыг хийж хэвшсэнийг дурьдаад, цаашид хавдартай жирэмсэн эхийн илрүүлэг, жирэмсний хяналт, жирэмслэлтийг тээлгэх асуудлыг шийдвэрлэх, гэрийн эргэлтийн чанарт онцгой анхаарах шаардлага буйг анхааруулав.
ЭСҮТ-ийн Тусламж үйлчилгээний албаны дарга Г.Ганхүү орон нутгийн эмнэлгүүд эхийн эндэгдлийн материалыг эмгэг судлалын шинжилгээнд хожуу хугацаанд ирүүлж байгааг танилцуулж, цаашид тохиолдол бүртгэгдсэн эмнэлэгтэй мэдээлэл (материалын чанар, ирүүлсэн хугацаа) бүхий хяналтын хуудсаар харилцана гэв.