Барилгын компаниуд оршин суугчдаа хулхидсаар байна. Хулхидагчдын хамгийн сүүлийн жишээ гэвэл “Тэдмэнт констракшн” болж буй ажээ. Тус компанийн барьсан Үндсэний цэцэрлэгт хүрээлэнгийн ард буюу Баянзүрх дүүргийн 26 дугаар хорооны нутаг дэвсгэр дэх “Нарлаг Өргөө” хотхоны оршин суугчид гомдлоо барж сууна. Тэндэхийн хэсэг оршин суугчдын мэдээлснээр “Тэдмэнт констракшн” компанийн Хятад эзэд орон сууцны стандарт хангаагүй байна. Халаалтаа саяхан авсан ч байр нь хүйтэн хэвээрээ, цахилгаан шат нь ажиллахгүй, шал нь завсар ихтэй, шалны хөвөө булангууд нь ховхорч унадаг, тагт нь байрныхаа дотор талд ашигтай талбайгаас хасч хийгдсэн зэрэг түмэн зовлон тоочих болжээ. Энэ тухай хэвлэл мэдээллийн хэрэгслээр мэдээлсэн иргэдээ компанийн удирдлага нь ад үзэж, “Та нар муу муухайгаа олон нийтэд дэлгээд байвал наад байр чинь дараагийн хүнд зарагдахгүй. Тиймээс хэвлэлийнхэнд хэлээд хэрэггүй” хэмээн ам өчгийг нь авч, гарын үсэг зуруулж буй аж.
Тагтгүй орон сууц барьсныгаа захирлууд нь “Веранд” бүхий барилга гэж нэрлээд байгаа нь бас сонин. Анх орон сууцны захиалга, гэрээ хийхэд ийм зүйл огт яригдаагүй байжээ. Гэрээнд тусгагдаагүй барилга угсралтын ажил хийж захиалагчдад шахсан нь нэгэн төрлийн залилан болж буй нь илт байна. Иймээс тус хотхоны оршин суугчид “Шударга өрсөлдөөн хэрэглэгчийн төлөө” газарт хандах гэсэн боловч харамсалтай нь компанийн Хятад эзэд “Та нар янз бүрийн гомдол яриад хэрэггүй. Хэдүүлээ эндээ учраа олно. Хэвлэл мэдээллээр энэ бүхнийг цацах нь та нарт ашиггүй” гэж сэнхрүүлж байгаа юм байна. Эцсийн эцэст талбайн хэмжээ, барилгын чанар, халаалт зэргээр хохирол амссан иргэд тэдний сэнхрүүлгэнд автаад чимээгүй суух нь юу л бол. Удахгүй шүүх танхимд уулзахаас өөр замгүй болох биз.
Эх сурвалж: Шуурхай.мн
