Камеруны засгийн газрын цэргүүд даваа гаригт “Боко харам” радикал бүлэглэл Колофата хот руу дайрах үед тэдний 143 дайчдыг устгасан байна. Энэ талаар Камеруны засгийн газрын албан ёсны төлөөлөгч, мэдээллийн сайд Исса Бакари мэдэгджээ.

Түүний өгүүлснээр, Камеруны цэргийнхэнээс нэг хүн амь эрсдэн, дөрвөн хүн шархдаж гэмтсэн аж. Мөн тэд радикал дайчдаас нэлээн олон хүнийг олзлон, буу зэвсэг, сум хэрэгслүүдийг хураан авсан байна.

Колофата хот руу өчигдөр өглөөгүүр хөрш Нигери улсаас Камеруны нутаг дэвсгэрт нэвтэрсэн дайчид довтолсон бөгөөд “Боко харам”-ын радикал дайчид Нигерийн зүүн хойд зүгийн 16 хот сууринг сүйтгээд байгаа билээ.

Камеруны Ерөнхийлөгч Поль Бийя өнгөрсөн долоо хоногт “Боко харам” радикал бүлэглэлтэй тэмцэхийн тулд олон улсын цэргийн тусламж зайлшгүй хэрэгтэй байгаа талаар мэдэгдэж байсан  юм. Түүний үзэж буйгаар, “Боко харам” нь Энэтхэгийн далайгаас Атлантын далай хүртэл өөрийн ноёрхлыг тогтоох зорилгоор Мали, Төв Африкийн улс, Сомали руу дайрсаар байгаа даяарчлагдсан хөдөлгөөний нэг хэсэг аж.

“Боко харам” радикал бүлэглэл нь Нигерийн зүүн хойд хэсэгт исламын халифатыг үүсгэн, шариатын дэглэмийг тогтоохыг эрмэлзэж байгаа бөгөөд сүүлийн хэдэн жилийн турш түүний дайчид тус орны эрх баригчдын эсрэг дайн явуулан, ихэвчлэн арми, цагдаагийн объектууд болон шашны нийгэмлэгүүдийн ахлагч удирдагчид, энгийн номхон ард иргэд рүү довтолсоор байгаа билээ.

“Боко харам”-ын дайралтын улмаас Нигерид сүүлийн таван жилийн хугацаанд 13 мянга гаруй хүн амь үрэгдэн, 1,5 сая хүмүүс дүрвэн зугатсан байна. 

Эх сурвалж: Zaluu.com