Сонгуулийн тухай хуульд заасны дагуу 2020 оны орон нутгийн сонгуулийн сурталчилгаа өнөөдрөөр дуусгавар болно. 14 хоногийн хугацаанд үргэлжилсэн сонгуулийн сурталчилгаа ийнхүү дуусаж, нөгөөдөр сонгуулийн санал хураалт орон даяар эхэлнэ. Сонгуулийн сурталчилгаа дуусахтай холбогдуулан Улаанбаатар хотыг хөгжүүлэх МАН болон АН-ын дэвшүүлж буй мөрийн хөтөлбөрт харьцуулалт хийв. Сонгуульд өрсөлдөх намуудын мөрийн хөтөлбөр бол сонгогчдын хувьд хамгийн чухал барим бичиг. Сонгуульд ялсан улс төрийн хүчин өөрсдийн мөрийн хөтөлбөрөө ирэх дөрвөн жилд хэрэгжүүлэх үйл ажиллагааны хөтөлбөр болгох учир сонгогчид нэр дэвшигчдийн болоод намуудын мөрийн хөтөлбөртэй танилцаж байж, сонголтоо хийх нь зөв юм.
Монгол Ардын Нам өнгөрсөн 4 жилийн хугацаанд Улаанбаатар хотод хийж, хэрэгжүүлсэн ажлынхаа залгамж халааг үргэлжлүүлж, ирэх 4 жилийн хөгжлийг тодорхойлсон бол сөрөг хүчний үүрэг гүйцэтгэсэн Ардчилсан намынхан /МАХН/ зөвхөн гэр хорооллын хөгжилд гол анхаарлаа хандуулсан мөрийн хөтөлбөр дэвшүүлжээ. Тухайлбал, өнгөрсөн 4 жилийн хугацаанд Улаанбаатарыг утаанаас салгаж, гэр хорооллыг богино хугацаанд хөгжүүлэх “Сервис центр” байгуулсан МАН-ынхан ирэх 4 жилд шинэ хот байгуулах замаар Улаанбаатар хотын авто замын ачаалал, хүн амын төвлөрлийг шийдэхээр дэвшүүлжээ. Тус улс төрийн хүчин Улаанбаатар хотыг нийгэм-эдийн засгийн төв болгон хөгжүүлэхээс илүүтэйгээр иргэдийн ажиллаж, амьдрахад тав тухтай эрүүл, аюулгүй орчин болгохоор зорьж байна.
Улаанбаатар хотыг хөгжүүлэх талаар олон янзын ажил санаачилж болох ч санхүүжилтийн асуудлыг шийдэж чадахгүйгээр мөрийн хөтөлбөрт тусгагдсан ажлуудаа хийж чадахгүй юм. Тэгвэл Монгол Ардын Нам Улаанбаатар хот үнэт цаас гаргаж, хөрөнгө оруулалт босгох замаар санхүүжилтийн асуудлыг шийдэхээр мөрийн хөтөлбөртөө тусгажээ. Энэ хүрээнд Нийслэлийн эрх зүйн байдлын тухай хуулийг шинэчилж, Улаанбаатар хотод бонд гаргах эрх зүйн орчныг бий болгохоор болсон байна. Харин Ардчилсан намынхан Улаанбаатар хотын нийгэм-эдийн засгийн хөгжилд анхаарахаас илүүтэйгээр зөвхөн гэр хорооллыг хөгжүүлэхээр мөрийн хөтөлбөртөө тусгажээ. Гэхдээ гэр хорооллыг хөгжүүлэх санхүү эдийн засгийн чадамжийг хэрхэн бүрдүүлэхээ Ардчилсан намынхан тодорхойлоогүй байна. Хөрөнгө мөнгө, санхүүжилтийн асуудлыг шийдэхгүйгээр ямар ч ажил хийж чадахгүй гэдгийг хүн бүхэн мэдэж байгаа.
Өөр нэг жишээ дурдахад, гэр хороололд авто зам тавьж, барилга барьж, цэцэрлэгт хүрээлэн байгуулснаар нийгмийн өмнө тулгамдсан бүхий л асуудлыг шийдэж чадахгүй гэдгийг Долоон буудлын Должин эмээ ч мэдэж байгаа. Хамгийн чухал асуудал нь нийгэм-эдийн засгийн суурь үзүүлэлт буюу өрхийн эдийн засгийн чадавхыг нэмэгдүүлж байж нийгмийн өмнө тулгамдаад буй ажилгүйдэл, ядуурал, хүчирхийлэл, орчны бохирдол, замын түгжрэл зэрэг асуудалд шийдэл олж чадна. Тэгвэл Монгол Ардын Нам өрхийн эдийн засгийн дэмжсэн хэд хэдэн заалтыг сонгуулийн мөрийн хөтөлбөртөө тусгажээ. Тухайлбал, өрх бүрийг үйлдвэрлэгч болгох зорилт дэвшүүлж, өрхийн эдийн засгийн бодитоор дэмжих боломжийг бүрдүүлэхээр зорьж байна. Харин Ардчилсан намын хувьд өрхийн орлогыг бодитоор дэмжихээс илүүтэйгээр гэр хорооллын дунд томоохон олон нийтийн барилгууд барихаас гадна Сэлбэ, Дунд голын савд В хиймэл нуур байгуулах зэрэг бүтээн байгуулалтын ажилд гол анхаарлаа хандуулжээ.
Энэ бол Монгол Ардын Нам болон Ардчилсан намын нийслэлийг хөгжүүлэх мөрийн хөтөлбөрийн хэдхэн заалтад хийсэн харьцуулалт. Тэгвэл зөвхөн гэр хорооллыг хэрхэн хөгжүүлэх талаар тусгасан намуудын мөрийн хөтөлбөрийн заалтуудыг доор харьцуулав.
