Таван толгойн хөрөнгө оруулалтын хэлэлцээний гурав дахь үе шат эхлээд удаагүй байна. Хэлэлцээгээр ярилцаж шийдэх 350 орчим асуудлаас одоо тав зургаахан нь үлджээ. Энэ нь хөрөнгө оруулагчидтай гэрээг эцэслэн байгуулах цаг хугацаа тун ойртлоо гэсэн үг. Гэхдээ хамгийн хүнд, адармаатай асуудлууд дээр талууд ярилцаж байна. Таван толгой дахь мега төсөл бол нэлээд том хэмжээний төсөл. Талууд хамтын ажиллагаанд 30 жилийг зарцуулна. Иймээс судалгаа сайтай ажиллахыг хичээж байгаа. Гэвч сайн үйлд садаа мундахгүй гэгчээр түрүү түрүүчийн Засгийн газрын үед Хятадын Чалко компанитай байгуулсан гэрээ, одоо болтол төлөгдөөгүй байгаа зээлийн өрийн үлдэгдэл болох 150 тэрбум төгрөг хэрхэн төлөгдөх зэрэг нь ихээхэн хүндрэл учруулах болжээ. Өрийг нүүрсээрээ төлдөгөөрөө л төлж барагдуулах биз. Гэхдээ хамгийн адармаатай нь Чалко-той анх хийсэн гэрээ нь өр төлбөрөө төлөөд дараагийн таван жилд олборлосон нүүрснийхээ 80 хувийг хөнгөлөлттэй үнээр өгөхөөр байгаа юм. Хятадын тал мэдээж нүүрсээ аль болох хямдаар авахыг хүснэ. Нөгөө нэг асуудал бол “Эрдэнэс Таван толгой”-н гүйцэтгэх захирал Я.Батсуурийг баривчилсан нь хөрөнгө оруулагчдын хэлэлцээрийн уур амьсгалыг бас хүндүүлж орхилоо. Энэ тухай уг мега төслийг удирдаж буй Монгол улсын сайд М.Энхсайхан “Хууль хяналтынхан ажлаа хийж л байна гэх биз. Тэр хүмүүсээ гадуур байцааж болдоггүй юм байх даа. Ер нь Таван толгойг хэт улс төржүүлэх хандалгатай болоод байна” гэлээ.
Б.Баяр
Эх сурвалж: Tumen.mn
