УИХ дахь МАН-ын бүлэг хэдэн сарын өмнөөс л тэтгэврийн зээлийн хүүг бууруулах боломжтой гэдгийг ярих болсон. Харамсалтай нь тэдний үгийг салбарын сайд нь сонсоогүй. Сонсохыг ч хүсээгүй гэхэд болох байх. Гэтэл нь энэ нь өөрийг нь огцруулах хүртэл хурцдаж эхлэв. Нэг үгээр хэлбэл, өчигдөр УИХ дахь МАН-ын бүлгийн дэд дарга Н.Номтойбаяр “Тэтгэврийн зээлийн хүүг бууруулах, малчдын тэтгэврийн насыг наашлуулах, шимтгэлийг нөхөн төлүүлэх асуудлаар хуулийн төсөл боловсруулж, удаа дараа санал шаардлага өгсөн ч өнөөг хүртэл шийдэхгүй байгаа Хүн амын хөгжил, нийгмийн хамгааллын сайд С.Эрдэнэд хариуцлага тооцох асуудлыг хөндөж тавина” гэлээ. Үүнээс үзвэл тэтгэврийн зээлийн хүүтэй холбоотой асуудал яах аргагүй салбарын сайдад нь хариуцлага тооцох хэмжээнд хүрч мэдэхээр болжээ.
Саяхан УИХ Төрөөс тэтгэврийн шинэчлэлийн талаар баримтлах бодлогыг баталсан. Тэтгэврийн шинэчлэлийн бодлого ярьж эхлэхтэй зэрэгцэн МАН-ынхан цалин, тэтгэврийн зээл болон малчны зээлийн хүүг бууруулах санаачилга гаргасан. Ийм боломжтой ч гэж тайлбарлаад байгаа юм.
Тэдний тайлбараар бол 190 мянган ахмад настан тэтгэврийн зээлтэй байгаа ба үүнд нийтдээ 355 тэрбум төгрөг эргэлдэж байдаг. Ахмадууд сард нийтдээ 5.3 тэрбум, жилдээ 63.9 тэрбум төгрөгийн хүүгийн орлого арилжааны банкуудад оруулж байна.
Түүнчлэн 2008-2012 оны Засгийн газрын үед Нийгмийн даатгалын сангийн хуримтлалыг зарим арилжааны банкинд 15 хувийн хүүтэй хадгалуулж байсан нь ч удаатай. Гэтэл өнөөдөр сангийн энэхүү хуримтлалыг 10.5 хувийн хүүтэйгээр арилжааны банкуудад хадгалуулж, хүүний хэмжээг даруй 4 хувиар багасгасан ч тэтгэврийн зээлийн хүү өмнөх жилүүдээс огтхон ч буураагүй. Одоогийн байдлаар Нийгмийн даатгалын сангийн чөлөөт үлдэгдэл 622 тэрбум төгрөгийн 532 тэрбум нь арилжааны найман банкинд байршиж байгаа. Арилжааны банкуудтай байгуулсан гэрээ ч удахгүй дуусгавар болно.
Иймд Хүн амын хөгжил, нийгмийн хамгааллын яам, Нийгмийн даатгалын үндэсний зөвлөл, арилжааны банкууд ойлголцолд хүрвэл тэтгэврийн зээлийн хүүг бууруулахад нэмэлт эх үүсвэр шаардагдахгүй, Төсвийн тухай хуульд өөрчлөлт орохгүй гэж МАН-ынхан тайлбарлаад байгаа. Гэвч үүнийг салбарын сайд С.Эрдэнэ хүлээн зөвшөөрөхгүй, ийм ч боломж байхгүй болохыг хэлээд буй. Үүгээр зогсохгүй Ардын намынхныг улс төр хийж, тэтгэврийн зээлийн хүүг бууруулахаар шоудаж байна хэмээн шүүмжилж байна. Засгийн газарт хамтарсан хоёр том нам ийн тэтгэврийн зээлийн хүүтэй холбоотой асуудлаар хоёр талд гарав. Хоёр талд гарсан тэдний нөхцөл байдал ХАХНХ-ын сайд С.Эрдэнийн сайдын суудлыг ч хөндөх нь.
Тэтгэврийн шинэчлэлийн асуудал зөвхөн зээлийн хүүтэй холбогдоод байгаа юм биш. Тэтгэврийн насыг нэмэх үү, үгүй юу гэдэг мөн том шүүмжлэлийн бай болсон. Бодлогын баримт бичигт тусгаснаар “Эрэгтэй, эмэгтэй даатгуулагчийн тэтгэвэр тогтоолгох насны доод хязгаар ижил байх...” гэдгийг оруулж өгсөн. Үүгээр бол эрэгтэй хүний тэтгэврийн насыг бууруулахгүй, харин эмэгтэйчүүд 55 насандаа тэтгэвэртээ сууж болно. Мөн 60 нас хүртлээ ажилласан ч болохоор зохицуулсан нь энэ аж. Цаашлаад тэтгэврийн насыг нэмэгдүүлэх асуудлыг судлаж үзэхээр бодлогын баримт бичигтээ оруулж өгчээ. Тэгэхээр яваандаа эрэгтэйчүүдийн тэтгэврийн насыг 62, эмэгтэйчүүдийнхийг 60 болгох боломжтой гэж харж буй бололтой. Тэтгэврийн насны маргаан ч МАН-ын бүлгийн гишүүдийн шүүмжлэлд нэлээд өртсөн.
ХАХНХ-ын сайд С.Эрдэнийн хэлж тайлбарлаж, бухимдаж байгааг харвал МАН-ын бүлгийнхний тавиад байгаа тэтгэврийн зээлийн хүүг бууруулах асуудлыг хүлээж авч, ажил хэрэг болгохгүй бололтой байсан. Иймээс МАН-ынхан түүнийг огцруулах төслийг өргөн барих ажил руу орохоор дүр зураг харагдаж байна.
Ц.Цацрал
Zaluu.com
