“Чонон сүлд” кино дэлгэцэнд гарснаас хойш багагүй шүүмжлэл магтаал аль алийг нь сонсоод байна. Урлаг соёлынхон, олны танил эрхмүүд киноны талаарх санал сэтгэгдлээ өөрсдийн цахим хуудсаар илэрхийлж, зарим нь монголчуудыг доромжиллоо хэмээн эгдүүцлээ илэрхийлээд ч амжсан. Тэгвэл МЗЭ-ийн удирдах зөвлөлийн дарга, зохиолч, яруу найрагч Ц.Буянзаяа “Чонон сүлд”-ийн талаарх сэтгэгдлээ хуваалцжээ. 

Тэрбээр “Би энэ киног интернэтээр үзсэн. Роман нь таалагдаагүй юм чинь кино яаж таалагдах билээ. Анх “Чоно тотем” нэртэйгээр монгол бичгээр Өвөрмонголд хэвлэгдсэнийг зохиолч анд маань өгч явуулсан юм. Тэгээд “Чоно тотем” романыг уншихад сунжирсан муу зохиол байсан учир нэг их ойшоогоогүй. 

Гэтэл удалгүй манайд “Чонон сүлд” нэрээр хэвлэгдэн гараад энэ ном руу хошуурах байдал хэрээс хэтэрч, энэ зохиол шиг гайхамшиг үгүй, Монголын зохиолчдын бичиж чадаагүйг бичжээ, дэлхийд нүүдэлчин ахуйг тунхаглачихлаа гэж шуугиад, “Чонон сүлд”-ийг уншаагүй хүн хүн биш гэж шүтэн бишрээд эхэлсэн. Тиймээс энэ номны үнэ цэнийг таниулахын тулд “Чонон сүлд ба хонин сэтгэлгээ”, “Чонон сүлд ба үндэсний оршихуй” гэсэн хоёр цуврал шүүмж бичсэн юм. Манайд Зян Руны романтай ижил сэдвээр бичигдсэн Д.Намдагийн “Хөгшин чоно ульсан нь” тууж байна. 1960-аад оны дундуур бичигдсэн энэ сонгодог зохиолын дэргэд өнөөдрийн “Чонон сүлд” бол зүгээр л нэг үгэн сувс, усан роман гэдгийг би ойлгуулахыг хүссэн” хэмээжээ.  Ямартай ч тэрбээр “Чонон сүлд”-ийг “усан роман” хэмээн тодорхойлсон байна.