Өмнөд Солонгосын улс төрийн дээд албан тушаалтны авлигын хэрэг ил болов. Тус улсын Ерөнхий сайд Ли Ван Гун энэ сарын 20-нд албан тушаалаас огцрох мэдэгдэл хийлээ. Солонгосын Ерөнхийлөгч Пак Гын Хэд Латин Америкын дөрвөн улсад айлчлал хийж явах хойгуур тэр ийнхүү мэдэгдсэн байна. Түүний авлигын эх үүсвэр тус улсын толгой бизнесменүүдийн нэг Сү Ван Жоны “хар жагсаалт”-тай холбоотой байх магадлалтай аж. Сү Ван Жон 2013 онд түүнд 30 сая вонн өгсөн хэмээн тэмдэглэж үлдээсэн байжээ. Ли Ван Гун Солонгосын Ерөнхий сайдаар энэ оны 2 дугаар сарын 17-нд томилогдсон юм. Тэр дөнгөж 63 хоног Ерөнхий сайдаар ажиллаад тийнхүү авлигын хэргийн улмаас албан тушаалаа өгөхөөр болжээ. Солонгосын түүхэнд энэ нь хамгийн богино хугацаанд Ерөнхий сайд байсан хүнээр тодорч буй хэрэг ажээ. Ерөнхийлөгч Пак Гын Хэд энэ сарын 27-нд эх орондоо ирж Ли Ван Гуны асуудлыг шийдэх юм байна.
Б.Баяр
Эх сурвалж: Tumen.mn
