ЦЕГ-ын Санхүү, ар талын газрын дарга асан хурандаа Л.Энх-Амгалан нарт холбогдох хэргийг УЕП-ын дэргэдэх мөрдөн байцаах албанд шалгаад Нийслэлийн прокурорын газарт яллах дүгнэлт үйлдүүлэх саналтай шилжүүлээд сураггүй болсон юм. Олон жил мөрдөн байцаалтад байсан уг хэргийг хэрэгсэхгүй болгосон талаар эх сурвалж хэлэв. Уг нь өнгөрсөн тавдугаар сард УЕП-ын орлогч прокурор хэрэгтэй танилцаад ойрын хугацаанд шүүхэд шилжүүлэх, мөрдөн байцаалтад буцаах эсэхийг шийднэ гэсэн мэдээлэл байсан ч ийнхүү замхарчээ. 
Дээрхи нэр бүхий хурандаа нарт 2012 оны аравдугаар сард Прокурорын дэргэдэх мөрдөн байцаах албанаас Эрүүгийн хуулийн тусгай ангийн 273.2-т зааснаар төсвийн хөрөнгийг зориулалтын бусаар зарцуулсны улмаас онц их хэмжээний хохирол учруулсан, 271.1-т зааснаар албан тушаалтан хуурамч бичиг баримт үйлдсэн, 264.1-т зааснаар төрийн албан тушаалтан эрх мэдлээ хэтрүүлсэн, давтан үйлдэл гаргаж, их хэмжээний хохирол учруулсан гэх үндэслэлээр тус тус эрүүгийн хэрэг үүсгэсэн байдаг. 
Хурандаа Л.Энх-Амгалан, Г.Уранцэцэг нар нь ЦЕГ-ын Санхүү, ар талын газрыг даргалж байхдаа цагдаагийн байгууллагатай гэрээтэй ажилладаг компаниудаас орж ирсэн хөрөнгийг /тухайлбал, харуул хамгаалалт, журмын хашаа гэх мэт/ “Гэрээт албаны” гэх төсвөөс гадуурх дансанд төвлөрүүлж байжээ. Угтаа энэ мөнгө төсөвт төвлөрөх ёстой аж. Түүнчлэн дээрхи эрхмүүд цагдаагийн алба хаагчдын ахуй хангамж, хоол хүнсний чиглэлээр хамтран ажилладаг компаниудтай гэрээ байгуулж, хөрөнгө төвлөрүүлээд, энэ гэрээгээ дахин ашиглаж Төрийн сангаас хөрөнгө гаргуулж байсан ноцтой үйлдэл хийсэн нь тогтоогджээ. Энэхүү хөрөнгөө мөн л төсвөөс гадуурх Гэрээт албаны гэх дансаараа дамжуулан зарцуулдаг байжээ.