Орцоор нь ороход л нүд хоросгом эхүүн муухай үнэр үнэртэж, үе үе бохирын шугам нь бөглөрч, цэвэр ус нь тасалддаг, элдэв төрлийн хорхой шавьж, бясаа үүрлэсэн, ёстой л муу бүхний уул уурхай болсон нэг газар хотын яг төвд байна гэвэл та итгэх үү.
Товчхондоо бол тэнд элдэв халдварт өвчин үржих таатай нөхцөл төгс бүрдсэн гэж хэлж болно.XXI зуунд хотынхоо төвд бясаа жоомтойгоо цуг хэдэн жилээр хамтдаа амьдарч байгаа тэдгээр иргэдийг үе үеийн хотын дарга, Хан-Уул дүүргийн Засаг дарга нар анхаарсан нь ер үгүй.
Хүн амьдарч болохгүй гэж мэргэжлийн байгууллагуудын дүгнэлт гарсан ч хүмүүс амьдарсаар даруй 10 орчим жилийг үдэж байна. Тэртээ 2012 онд Ашиглалтын шаардлага хангахгүй орон сууцны барилгыг дахин барилгажуулах журам гарч Нийслэлийн Засаг даргын 2016 оны 8 дугаар сарын 15-ны өдрийн А/709 тоот захирамжаар Нэхмэлийн шарын 21 орон сууцыг буулгах байв. Тэгвэл тэрхүү захирамж өнөөдрийг хүртэл бүрэн дүүрэн хэрэгжсэн нь үгүй.
НЗД-ын захирамж бүрэн хэрэгжихгүй байгаа шалтгаан нь эрх мэдэлтнүүдийн наймаалцал. Энэхүү наймаалцалд дүүргийнх нь Засаг дарга нар ч оролцож иргэдийнхээ эрхийг зөрчиж байсан байдаг. Тэдгээр 21 барилга эхнээсээ нураагдаж буулгагдсаар өдгөө 12, 13, 15, 16, 17, 18 дугаар байрууд л үлдсэн. Гэтэл баригдсан барилгууд нь гарын 5 хуруунд багтах төдий л байгаа. Эдгээр үлдсэн барилгуудыг буулгая гэхээр “БОЛОМЖГҮЙ”
Учир нь эдгээр 6 байрны дунд шинээр 2 орон сууц барьчихсан. Барилгын стандартаар бол Барилга хоорондын зай метр байна гэж заасан байдаг ч үүнийг ёстой л огоорч 8 метр битгий хэл 8 см ч зайгүйгээр шинээр орон сууц барьчихсан.
Орных нь үүдэнд үүсэн энэ нүхэнд олон ч хүүхэд, хөгшид хөлөө гэмтээсэн байдаг
Хууль завхруулагсад тэр хавийн оршин суугчдыг хэд гурван төгрөгөөр хахуульдсан гэж байгаа. Энэ хэрэгт ХУД-ийн нөлөө бүхий дарга нар ч оролцсон гэх баримт бий.
Ёстой нөгөө зүү орох зайгүй гэдэг шиг чигжээд барьчихсан учраас нураагдах захирамжтай барилгуудыг нурааж эхэлбэл шинэ байруудын оршин суугчдад эрсдэл дагуулах юм гэнэ.
Хэн гэдэг албан тушаалтан, хууль, дүрэм журам, барилгын стандартыг зөрчин ийнхүү барилга барьж бусдын эрхийг өөрийнхөө эрхээр хязгаарласныг олонд ил болгох сонирхол тухайн дүүргийн Засаг дарга нар болон, үе үеийн Нийслэлийн Засаг дарга нарт ч үнэндээ байгаагүй гэхэд болно. Товчхондоо бол Хан-Уул дүүргийн Засаг даргаар удаа дараа сонгогдож байгаа Ж.Алдаржавланд нийслэлийн Засаг даргын захирамжийг биелүүлэх сонирхол алга гэж ойлгож болно.
Зүү орох ч зайгүй энэ барилгыг барихад Засаг ноёны дэмжлэг бий гэж оршин суугчид ярьдаг
Тэрбээр 2020 оны УИХ-ын сонгууль ХУД-ээс хүч үзсэн ч ард иргэдийнхээ саналыг авч чадаагүй нь иргэдийнхээ төлөө, дүүргийнхээ төлөө ажилладаггүйг нь ч гэрчилсэн гэж харагдаж байгаа юм.
Олныг үл нуршин “НЭХМЭЛИЙН ШАР” ынхан буюу 12, 13, 15, 16, 17, 18 дугаар байруудад амьдарч байгаа Хан-Уул дүүргийн 2 дугаар хорооны оршин суугчид Нийслэлийн Засаг дарга бөгөөд Улаанбаатар хотын захирагч Д.Сумъяабазар таныг ирж нөхцөл байдалтай танилцана уу хэмээн хүсч, хүлээж байгааг уламжилъя.
Erennews.mn
