Өнөөдөр Монголын Зэвсэгт хүчний баярын өдөр. Аль ч орны цэргийнхэн нийгэмдээ онцгой үүрэгтэй.  Эх орноо батлан хамгаалах үйл хэрэг  нь агуу их үнэ цэнтэй.

Манай улсын батлан хамгаалах бодлого, үйл ажиллагаа сүүлийн хорь гаруй жилд ихээхэн өөрчлөгдөж, чанаржсаар байна. Ялангуяа  дэлхий, бүс нутгийн хэмжээний  үүрэг гүйцэтгэх болжээ. Энэ нь Олон улсын энхийг дэмжих үйл ажиллагаа юм. НҮБ-ын болон олон улсын энхийг дэмжих ажиллагаанд 2002 оноос идэвхтэй оролцож байна. 2003 онд Ирак дахь дайны нурам дунд үүргээ амжилттай биелүүлсэн. Энэхүү  ажиллагааны үеэр Монгол цэргүүд 1945 онын дайнаас  хойш анх удаа улс гүрэн дамнасан марш үйлдсэн юм. Иракт цэргийн 30 гаруй техниктэйгээр ажиллаж, Кувейтээс Ирак руу маршаар 670 гаруй км зам туулсан нь манай цэргийнхний амь дүйсэн явдал байлаа. Хамгийн сүүлд Өмнөд Судан улсад энхийг дэмжигчдийн батальоноо хоёр  ээлжээр илгээсэн нь анхны томоохон хүч бүрэлдэхүүнээр олон улсын ажиллагаанд оролцсон явдал болсон юм.  

Өнгөрсөн хугацаанд давхардсан тоогоор 11 мянга гаруй цэргийн албан хаагчид энхийг дэмжих ажиллагаанд оролцжээ. Энхийг дэмжих ажиллагаанд оролцох нь тусгаар тогтнол, аюулгүй байдлаа улс төр, дипломатын аргаар хамгаалж буй хэрэг юм.

Өнөөдөр Монгол цэргийн дарга нараас Судан улсад НҮБ-ын Хойд секторын цэргийн командлагчаар бригадын генерал Д.Баярсайхан ажиллаж байна. Энэ нь НҮБ-ын хэмжээнд Монгол цэргийн үнэлэмж улам өсч буйг харуулж буй хэрэг юм.

Монголын офицер, ахлагч нарыг бэлтгэхэд дэлхийн 20 гаруй улс орон  тусалж байгаа аж. Батлан хамгаалах салбараас өөр ийнхүү олон улс оронд боловсон хүчнээ бэлтгэдэг салбар бараг байхгүй. Энэ бол Монголын Зэвсэгт хүчин дэлхийн хэмжээний шилдэг мэргэжилтнүүдээр эгнээгээ бэхжүүлж байгаагийн тод илэрхийлэл болж байна.

Б.Отгон

Эх сурвалж: Tumen.mn