БНХАУ-ын талаас Монголын нүүрсний хоёр дахь боомт болох Шивээхүрэн боомтын нүүрс экспортыг энэ сарын 25-аас эргэн сэргээхээр болсон талаар албаны эх сурвалж мэдээлэв. Үүний өмнө боомтын үйл ажиллагааг сэргээх ажлын хэсгийн ахлагч, Хууль зүй, дотоод хэргийн Х.Нямбаатар ажлын хэсгийнхэн Шивээхүрэнгийн боомтыг нээх талаар оролцогч талуудтай цахим уулзалт хийж, нааштай үр дүн гарч байгаа талаар хэлсэн байдаг. Мөн тэрбээр Шивээхүрэн боомтод ажиллахдаа БНХАУ-ын талаас Монгол Улсын Шивээхүрэн хилийн боомтыг энэ сардаа багтаан нээхээр болсныг дипломат шугамаар мэдэгдсэн болохыг хэлж байсан.

Улмаар Ерөнхий сайдын захирамжаар байгуулагдсан Хилийн Гашуунсухайт, Шивээхүрэн боомтын үйл ажиллагааг эрчимжүүлэх тус ажлын хэсгийн зүгээс КОВИД-19 цар тахлын үед экспортын голлох боомтуудад баримталж байсан “Bubble” буюу бөмбөлөгийн системийг хатуу чанд мөрдүүлснээр ахиц гарсан байна.

Энэ талаар БНХАУ-ын Өвөрмонголын боомтын захиргаанаас мэдэгдэхдээ, цаашид хорио цээрийн дэглэмийг үр дүнтэй сахиулж, халдварын тохиолдолд илрээгүй тохиолдолд Шивээхүрэн-Сэхэ боомтоор хийгдэж буй нүүрсний экспортыг долоо, долоо хоногоор нэмэгдүүлэхэээ илэрхийлсэн байдаг. Тэгвэл Өвөрмонголын боомтын захиргааны ажлын хэсэг өнөөдрөөс /2022.04.20/ Шивээхүрэн-Сэхэ боомтод ажиллаж эхэлсэн байна. БНХАУ-ын тал зургаан сарын хугацаанд хаалттай байсан Шивээхүрэн-Сэхэ боомтын нүүрсний импортыг сэргээх бэлтгэж ажлаа хангаж байгаа аж.

Энэ хүрээнд БНХАУ-ын талаас тавьсан халдвар хамгааллын дэглэмийг сайтар сахиулж, шинээр PCR шинжилгээний хоёр лаборатори байгуулжээ. Ингэснээр Шивээхүрэн боомтод хуримтлагдаад буй долоон сая орчим тонн нүүрс ойрын хугацаанд экспортод гаргаж дуусгах нөхцөл бүрдэх юм.

Мөн Засгийн газраас томилогдсон Ажлын хэсэг БНХАУ-ын талтай тохиролцсоны үндсэн дээр нүүрсний экспортод тодорхой нөлөө үзүүлдэг Ханги-Мандалын боомтын үйл ажиллагааг ойрын хугацаанд мөн сэргээхээр болжээ.