Өчигдөрхөн болсон сүр дуулиантай “Дижитал Үндэстэн” хэмээх Засгийн газрын шоу нийтийн эрүүл мэндэд гамшиг учруулаад зогсохгүй ЗАМЫН-ҮҮДИЙН ГАЦАА, ЭМЧ НАРЫН АЧААЛАЛ, ХҮҮХДҮҮДИЙН БОЛОВСРОЛ гэсэн 3 асуудлыг дахиад мухардалд орууллаа.

Нэг. Гадаад худалдааны гацаа арилах нь бүү хэл улам нэмэгдэхээр боллоо. Монголчууд бид Ерөнхий сайдаараа манлайлуулан коронвирусын хамгийн хурдан тархалттай дельта хувилбарыг ямарч хяналтгүй тарааж байгаагаа олны өмнө баталчихлаа. Ийм хариуцлагагүй нөхдүүдийг хилээрээ чөлөөтэй оруулж, гаргах улс орон олдохгүй л болов уу. Нөгөө худалдааны квотоо ярих гэж ядаж байгаа Гадаад харилцааныхны ажил өчигдөр хэдхэн минутын дотор нуран унав. Бидэнтэй одоо ажил хэрэгчээр ярих, бидний үгэнд үнэмших, ачаа барааг саадгүй оруулж гаргах гэдэг хэцүү асуудал болох нь. Үр дүнд нь юу болох вэ гэхээр импорт буурна, бараа хомсдоно, тээврийн үнэ зардал дахиад нэмэгдэнэ, тэгээд эцсийн бүтээгдэхүүний үнэ нэмэгдэнэ. Дахиад бүгдээрээ энэ мөнгийг хувааж төлөх нь.

Хоёр. Гэртээ ч харих завгүй, амралтгүй, цалин хөлсгүй шахам ажиллаж байгаа эмч, сувилагч, эмнэлэгийн ажилтуудын маань хэрээс хэтэрсэн ачаалал дахиад хэдэн сар жилээр үргэлжлэх нь ээ. Ядаж байхад хүйтний улирал яг хаяанд ирчихсэн хаалга тогшиж байдаг. Дагаад утаа униар. Уушигт орсон вирус цусан дахь хүчилтөрөгчийг хамгийн түрүүнд бууруулна, дээр нь утаа, дээр нь хүйтэн агаар нэмэгдэхэд амьсгалын аппарат улам хүрэлцээгүй болж олон хүний амь нас аюулд өртөнө. Зүй нь засагт мөнгө байдаг юм бол эмнэлэгүүд рүү өгч, ор байдаг юм бол бүгдий нь тоноглож, хүндрэх өвчтөний давалгааг яаж даван гарахаа бэлтгэж байх ёстой. Хөдөөгийн эмнэлэгүүдэд дутагдаж байгаа аппарат хэрэгслийг яаралтай илгээж байх ёстой юм. Гэтэл засаг яг эсрэгээр нь хийв. Яавал эрүүл мэндийн салбарыг улам нураах вэ гэсэн шиг ажиллав. Одоо Засгийн энэ алдааг бид өөрсдийнхөө эрүүл мэндээр, эмийн мөнгөөр, эмнэлэгийн зардлаараа төлөх гэж байна.

Гурав. Хоёр жил сургуульгүй гэртээ хашигдсан хүүхдүүд нийгэмших гэж ядаж байна. Багшийнхаа зааж байгаа зүйлсийг ойлгох гэж хичээж байна. Хүүхдүүд маань боловсролоороо дэлхийгээс хоёр жилээр хоцорчихсон яваа дээрээ дахиад хэдэн сараар хоцрох вэ. Хавьтагч нарын тоо хязгаараа алдаад ирэх үед сургуулийн орчин хамгийн түрүүнд халдварыг үржүүлэн тараагч орчин болдог нь тодорхой тул хүүхдүүдийг дахин хөл хорих нөхцөл үүсч магадгүй болж байна. Дахиад хоцрогдлоо үргэлжлүүлэх үү. Арайхийж хүүхдийн хоцрогдлыг хамтарч нөхөх талаар ярьж байгаа багш, эцэг эхчүүдийн хооронд засгаас болоод ойлголтын зөрүү дахин үүсэхээр болчихлоо. Энэ бол боловсролын салбарыг унаж байгаа дээр нь унагаасан, хүүхдүүдийн ирээдүйг хулгайлсан гамшиг болох юм. Засгийн хөнгөн хуумгай шийдвэрийг төлбөрийг хүүхдүүд ирээдүйгээрээ төлөх нь!

Уг нь энэ бүхнийг тал бүрээс нь ярилцаж бай гэж Засгийн газрыг байгуулдаг. Сайд нарынхаа байр суурийг нэг зүгт чиглүүлж, багийг баг байлгаж удирдах үүрэг Ерөнхий сайдад байдаг. Гэтэл Ерөнхий сайд нь өөрөө багийнхаа бүх хичээл зүтгэлийг үгүй хийж байна! Юун баг удирдах! Л.Оюун-Эрдэнэ өөрөө багийн тоглогч огт биш гэдгээ харууллаа.

Харин миний хувьд бүх лиценз, тусгай зөвшөөрөл Засгаас хараат байдаг хувийн хэвшил буюу харилцаа холбооныхон, хичнээн эрсдэлтэй ч хоёр жил хөл хоригдсон иргэд, ялангуяа залуусыг буруутгах арга үнэндээ алга. Зохион байгуулагч л бүх бурууг хүлээх ёстой.

Эцэст нь хэлэхэд цахим арга хэмжээг цахимаар хийвэл цахим гэж тооцдог юм шүү! Оюун-Эрдэнэ ээ!!!

Ц.Оюунгэрэл