Эдийн засгийн хөгжлийн сайд Н.Батбаярын хариуцаж буй яам бүтцийн өөрчлөлтөд өртсөнөөр тэрээр сайдын албаа өгөх нь тодорхой болж байна.

МАН-ын бүлгээс  хоёр ч удаа огцруулах "виз" хүлээн авч, сүүлийнхийг нь энэ чуулганаар хэлэлцэгдэхээр товлогдсон ч бүтцийн өөрчлөлт нэрээр түүнийг хариуцлагаас мултлах нь бололтой. Уг нь бүтэц, хариуцлагын асуудал тусдаа байх ёстой гэж  МАН-ын бүлгээс удаа дараа шаардаж байгаа ч эрх баригчид Н.Батбаяр сайдыг огцруулах асуудлыг хэлэлцэхгүйгээр түүнд "цомхотгол, бүтцийн өөрчлөлт" гэсэн шошго зүүлгээд явуулах гэж байна.

Эдийн засгийн хөгжлийн хэмээх гоё нэртэй бие даасан яамыг байгуулсан ч хоёр жилийн хугацаанд эдийн засаг шалдаа бууж, уруудсан учраас яам толгойлж буй сайдтай хариуцлага тооцох, хариуцлага нэхэх нь зүй ёсны хэрэг. 100 хоногийн тоолууртай "Эзэн-100", "Чингис", "Самурай" бонд гээд их мөнгөөр хэмжигдэх эдийн засгийн агуулгатай олон ажлын үр дүн, хариуцлагын асуудлыг сайдаас  нэхэх ёстой. Гэхдээ хариуцлага тооцох шаардлага бүтцийн өөрчлөлтийн далбаанд замхрах ёсгүйг ард иргэд сануулж байгаа юм.