Манай улс хэмжээлшгүй газар нутагтаа хирнээ газрын төлөөх тэмцэлдээнийг аль хэдийнээ эхлүүлжээ. Бүтээн байгуулалт нэрээр олон нийтийн өмчийн газрыг булаах асуудал үргэлжилсээр байгаа нь харамсалтай. Хүүхдийн тоглоомын талбайг булааж дуусч ханаагүй байгаа бололтой. Сүүлдээ голоо хүртэл ширгээж эзэмшил газартай болохыг улайрагчидыг дарах эрх мэдэл-тэн алга уу хэмээн халагламаар хэргүүд ар араасаа хөвөрсөөр байна.

Баримт нэг:  Сонгино хайрхан дүүргийн 15 хорооны нэгдүгээр хорооллын 19, 20 дугаар байрны хүүхдийн тоглоомын талбайд машины зогсоол барихаар улайрч байгаа гэнэ.  Тус байрны дундах хүүхдийн тоглоомын талбай руу барилгын компани газар доорх автомашины зогсоол барихаар газрыг нь хууль бусаар булаан авахаар ажиллаж эхэлсэн байна. Энэхүү байрны тоглоомын талбай Нийслэл хотод байгаа хамгийн том хэмжээтэй ганцхан тоглоомын талбай гэдгийг оршин суугчид онцлов.

Хуулиараа бол хүүхдийн тоглоомын талбай тохижилт бүхий автомашины зогсоол байгуулах Нийслэлийн Засаг даргын захирамж гарсан тохиолдолд автомшины зогсоолыг барих журамтай байдаг. Гэтэл 19,20 дугаар байрны дундах тоглоомын талбайг автомашины зогсоол болгохоор зэхэж буй И.Ганцог гэдэг хүн оршин суугчдаас судалгаа авч байна хэмээн худал хэлж гарын үсгийг нь цуглуулжээ. Тиймээс байрныхан түр хороо байгуулаад холбогдох газруудад хандаж эхэлсэн байна.

Баримт хоёр: "S.Outlets" дэлгүүрийн эзэд Сэлбэ голын эргийг ашиглаад зогсохгүй нь ээ. Сэлбийн эргийг түрээд зогсохгүй, гол дээр нь шороо асгаж, хашаагаа томсгосоор байгаа юм. Оршин суугчид эл асуудлыг эсэргүүцэн, гомдол гаргасан ч өнөөг хүртэл шийдэгдээгүй. Ерөнхий сайд асан С.Батболдын санаачилгаар "Сэлбэ голын урсацыг нэмэгдүүлэх, орчныг тохижуулах" төслийн хүрээнд өнгө төрхийг нь өөрчлөхийн сацуу голоо аврахаар бүтээн байгуулалтын ажлыг одоогоос дөрвөн жилийн өмнө өрнүүлсэн. Гэтэл 350 метр газрыг нь тохижуулаад ажлаа зогсоосон. Гэтэл өнөөдөр Монгол улсад мөрдөгдөж байгаа хууль дүрмийг зөрчсөн этгээдэд үг хэлж байгаа эрх мэдэл-тэн алга аа. 

Тодруулбал, Үерийн хамгаалалтын зурвасаас 10 метр зайд барилга барьж болохгүй гэсэн хууль тогтоомж бий. Гэтэл "S.Outlets" дэлгүүрийн эзэд Сэлбэ гол дотор дур мэдэн шороо асгаж, далан босгов. Энэ асууалд, НМХГ-ын Байгаль орчны хяналтын улсын байцаагч Б.Сайнбаяр ""С.Сайн" ХХК Сэлбэ гол дотор дур мэдэн шороо асгаж, далан босгосон. Тухайн компанийг зөвшөөрлийн бичиг баримтаа авч ирж үзүүлэхийг үүрэг болгосон боловч тэд одоогоор бидэнд юу ч авч ирж үзүүлээгүй байна. Тэгэхээр тэдэнд холбогдох байгууллагуудаас авсан ямар ч зөвшөөрөл байхгүй гэдэг нь тодорхой. Ер нь үерийн хамгаалалтын далан босгохын тулд усны барилга, байгууламж гэдгээрээ заавал холбогдох байгууллагаас зөвшөөрөл авах ёстой байдаг. Гэтэл бичиг баримт дутуу, гэрчилгээгээ сунгуулах гээд өгчихсөн гэх нэрийдлээр зөвхөн менежер нь л ирж уулзсан" хэмээв. Ийнхүү ажил үүргээ гүйцэтгэж яваа хүний ажлыг хүртэл үл тоомсорлон суугааг эл явдлаас тод харагдаж байна. 

Баримт гурав: Хэдхэн сарын өмнө Баянгол дүүргийн зургадугаар хорооны 44Б байр 98-дугаар цэцэрлэгийн хооронд 60 автомашины газар доорх гарааш, иж бүрэн тоглоомын талбай барихаар болсон. “Абсалютган констракшн” компани хийх байсан ч тус хорооны цэцэрлэгийн удирдлага, оршин суугчид зөвшөөрөөгүй учраас Нийслэлийн Ерөнхий төлөвлөгөөний газраас барилгын ажлыг зогсоосон удаатай.  Гэвч тус компани нэр, байршлаа өөрчилж 43, 44А, Б байрнуудын дунд байрладаг нийтийн эзэмшлийн буюу хүүхдийн тоглоомын талбайд урьдын адил 60 автомашины газар доорх дулаан гарааш барих зөвшөөрөл авчээ. Ингэхдээ “Абсалютган констракшн” компани өмнөх барилгынхаа үед 20 сая төгрөгийн үнэтэй дулаан гараашийг арван саяар өгнө, судалгаа авч явна гэх мэтээр иргэний үнэмлэхийг нь хуулбарлаж, цуглуулсан гарын үсгээ дараагийн байршилд зөвшөөрөл хүссэн өргөдөлдөө ашигласан. Мөн хорооных нь “Далт” СӨХ-нд “Баян марз” хэмээх өөр нэрээр албан бичиг өгч зөвшөөрөл авсан гээд нийтийн эзэмшлийн тэр тусмаахүүхдийн тоглоомын газрыг булаах үйлдэл Нийслэл хотод хэрээс хэтрээд байгаа юм. 

Ийнхүү дураараа дургигчдыг дарах эрх мэдэл-тэн алга уу!

Х.Даваа

Эх сурвалж: www.dorgio.mn