АН-ын туг, тамгаа булаалдсан өлсгөлөн үргэлжилсээр… Намын дотоод зөрчлөөс үүдэн алдсан боломжуудаа нэхэж, бурууг бусдаас хайсан тэдний тэмцэлд хариу өгөх эзэн бие үнэндээ байхгүй.
Ичсэн хүн хүн ална гэгчээр Ерөнхийлөгчийн сонгууль дуустал, эсвэл хэн нэгнийхээ амийг зольж байж зогсох юм уу?!
Өлсгөлөнгийн өдөөн турхирагч, санаачлагч, зохион байгуулагч нь Монгол Улсын Ерөнхийлөгч Х.Баттулгыг гэж олон нийт харж байгаа нь үнэн. Үүнийг батлах мэт өлсөгчид дээр эрхэм Төрийн тэргүүний ирсэн үйл явдал, тавьж буй асуулт, харилцаа хандлагын өнгө аяз хиймэл, өлсөгчдийн дүр хуурмаг зохимжгүй байлаа. Тэнд энд сэтгүүлчид тэрий хадан унаж буй нь ямар нэг сэдвийн гал өрдөх гэсэн мэт зохиомол харагдана.
Эрх баригч намын дарга У.Хүрэлсүхийн улайрал, намаа бутарган түүнд “үйлчлэн” зүтгэлэх С.Эрдэнэ, эрх мэдлийн нь хэмжээнд цэг тавигдан өнөө маргаашгүй байдгийнхаа баруун хаяанд очих Х.Баттулга, зүгээр л ЗӨВЛӨХ хэр хэмжээнд байхад л таардаг, түүнээс цааш удирдах, улсын гадаад дотоод бодлогод уран нүүдэл хийх улстөрийн тоглолтгүй Д.Энхбат гээд энэ удаагийн Монгол Улсын Төрийн тэргүүний суудал руу чичрэн зүтгэгчид нэг л өнгөгүй…
Улсынхаа Ерөнхийлөгч болгоод сэтгэл ханамж дүүртэл дугуйлчих лидер энд алга. Тэгээд ч цар тахлын хүнд бэрхийн золиос нь иргэд, олон нийт л болж байна. Дотоодод халдвар алдсанаас хойш 200 шахам хүн халдварын хүндрэлээс ертөнцийн мөнх бусыг үзүүллээ.
Тиймээс энэ удаагийн сонгуулийг цагаан сонгууль болгож, ингэтэл улайрсан нөхдийн мөрөөдөлд цэг тавьчих боломж иргэдэд, Монголын ард түмэнд бий. Улайрсан нөхөд сонгууль хойшлуулалгүй хийсэн ч саналын хуудсыг бөглөлгүй цагаанаар нь уншуулчих эрх бидэнд байгаа юм.
Дэлхийн 226 улс, бүс нутагт бүртгэгдсэн ковид19 халдвараар 60 сая хүн өвчлөөд байна. Хоногт 10 000 гаруй нас баралт бүртгэгдэж, 3.3 сая хүн эндлээ.
Цар тахлын улмаас Токио2020 олимпийг нэг жилээр, 2022 онд Дакарт зохион байгуулах байсан өсвөр үеийнхний IV олимпийн наадмыг дөрвөн жилээр хойшлуулав. Тэрчлэн 56 улс орон ээлжит сонгуулиа хойшлуулчихаад байгаа.
Эрх ашгаас үнэтэй амь, эгэл ардын өдөр бүрийн өлсгөлөнг давах ӨЛСГӨЛӨН гэж үгүй.
Тэгэхээр МАН-ынхан У.Хүрэлсүхээ, С.Эрдэнийн талынхан түүнийгээ, Ц.Тувааныхан тэртэй тэргүй сонгууль өгөхгүй биз. ХҮН-ынхан Д.Энхбатаа дугуйлаг. Намчид намаа дугуйлаад, харин улс төрийн намын малгайгүй олон нийт саналын хуудсыг цагаанаар нь явуулчихъя.
Ард түмнийхээ сэтгэлд хүрэхгүй, лидер биш лойдор нөхдийг хүчээр дугуйлах шаардлагагүй шүү дээ.
2017 оны Ерөнхийлөгчийн ээлжит сонгуулийн хоёр дахь санал хураалтын дүнгээр нийт санал өгсөн 1.207.787 иргэний 99.494 иргэн буюу 8.23 хувь нь санал огт тэмдэглээгүй “цагаан” хуудас тоолуулсан байсан. Тухайн үед үүнийг анхан шатны сонгуульд бүдэрсэн нэр дэвшигч, улс төрийн хүчний өшөө хорсол, хонзогнол мэтээр тайлбарлаад өнгөрсөн ч чухамдаа монголчууд тэнэг биш шүү гэдгийг сануулсан ноцтой сануулга, хатуу анхааруулга байсан юм.
Нэр дэвшигч 50%+1 санал авч чадаагүй тохиолдолд дахин санал хураалт явуулахаас өөр арга байхгүй. Улмаар Сонгуулийн тухай хуулийн 13.2-т “Тухайн сонгуульд нэг хүний нэрийг дахин дэвшүүлэхгүй” гэж тодорхой зааж өгсөн.
Тэгэхээр МАН, АН, ХҮН намууд Ерөнхийлөгчийн сонгууль дахихад нэр дэвшигчээ солино гэсэн үг.
Ард түмнээсээ хатуу шанаа авсан намууд дараагийн удаад арай өөр боломжит хувилбарууд дэвшүүлэх нь гарцаагүй. Тэр үед олон түмнээрээ Төрийн тэргүүнээ учиртайхан сонгочиход болохгүй юмгүй.
Эс бөгөөс өнөөдрийн нөхцөл байдалд Ерөнхийлөгчийн сонгуулийг амжилттай явууллаа ч санал хураалтын маргааш 2008 оны сонгуулийн дараах 7 дугаар сарын 1-н шиг ХАР ӨДӨР болж болзошгүйг бид харж байна.
Тиймээс өлсөгчид хэнд гомдсоноо ч ойлгохгүй өлсч хэвтэхийнхээ оронд босоод энэ сонгуульд нэрээ дэвшүүлсэн 3 нөхрийн нэрийг дугуйлахгүй байхад л болно шүү гэдгийг ухуулаад явчих нь үр дүнд илүү ойр юм. .
Niigmiintoli.mn
