“Монголын байгаль орчны иргэний зөвлөл”, “Гол нууруудын нэгдсэн хөдөлгөөн”, “Хил хязгааргүй гол мөрөн”, “Их бага Баян шарга”, Оюу толгойн хяналт” төрийн бус байгууллагуудаас  мэдээлэл хийлээ.

Тэдгээр иргэний байгууллагууд сар шинийн баярын битүүний өдөр батлагдсан “Гол мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хуулийг дагаж мөрдөх журмын тухай” хуульд нэмэлт өөрчлөлт оруулах хуулийн төслийг баталсанд  дургүйцэж буй аж. Мэдээллийн үеэр гадаад дотоодын  уул уурайн компаниуд “Урт” нэртэй хуулийг биелүүлэхгүй явсаар ирсэн гэж тэд  онцоллоо.

2011 оны 10 дугаар сарын 20-нд Дээд  шүүхийн хяналтын шатны иргэний хэргийн шүүх хуралдаанаар дээрх хуулийг хэрэгжүүлэхтэй холбоотой асуудлыг хэлэлцээд УИХ-ын 2009 оны 7 дугаар сарын 16-ны өдрийн 55 дугаар тогтоолыг  хэрэгжүүлэхийг Засгийн газарт даалгасан 687 дугаар тогтоолоо гаргасан байв. Гэвч энэ тогтоол нь хэрэгжилгүй гурван жил болжээ.   Шүүхийн шийдвэрийг албадан гүйцэтгэх тухай 1249 тоот захирамж  ч мөн хэрэгжээгүй байна. Энэ нь Үндсэн хуулийн “...Улсын Дээд шүүхийн шийдвэр шүүхийн эцсийн шийдвэр байх бөгөөд түүнийг бүх шүүх, бусад этгээд заавал биелүүлнэ...” гэсэн заалттай зөрчилдөж байгаа аж.

Иймээс битүүний өдөр яаран баталсан дээрх хуулийн төслийг баталсан УИХ-ын шийдвэрт хориг тавихыг Монгол улсын Ерөнхийлөгч Ц.Элбэгдоржоос тэдгээр иргэний байгууллагууд шаардаж, хүсч  буйгаа илэрхийлсэн байна.

Б.Баяр

Эх сурвалж: Tumen.mn