Цар тахлын хорио дэглэмд шилжсэн учраас Төрийн эрх барих дээд байгууллагаас эхлээд түмэн олон хүртэл хөл хорионд байна. УИХ-ын чуулганы хуралдаанаар хөл хорионы дэглэмд шилжсэнтэй холбогдуулан, эдийн засаг, ард түмний амьдрал ахуйтай холбоотой асуудлыг гол төлөв хэлэлцэх аж. Гэнэтийн тохиолдолд УИХ-ын гишүүд, төрийн өндөр дээдэс маань ч барьц алдаж, байгаа бололтой. Цахим чуулганы хуралдаан бусад үйл ажиллагаанаас харахад тэд чамгүй бухимдалтай байгаа ч хувь хувийнхаа улс төрийг огт мартсангүй. Тодотгож хэлбэл, улстөрчид улс орон, ард түмний өмнө тулгамдаж байгаа асуудал хэлэлцэж байхад хувь улстөрчийн рейтингээ өсгөх тал дээр ч анхаарч байгаа нь олон нийтэд огт таалагдахгүй байна.
Харин амьдрал, ард түмний дундаас урган гарсан цөөн гишүүд эгзэгтэй цаг үед чухал чухал асуудал хөндөж, шийдвэрлэхийг зорьж байгаа нь талархууштай. Цагийн байдлаа үнэлж, эгзэгтэй цаг үед оновчтой шийдвэр гаргадаг Төрийн түшээд цагийн цагт ус агаар мэт хэрэгтэй байсаар ирсэн. Тухайлбал, УИХ-ын гишүүн Л.Энх-Амгалан зээлийн хүүг зогсоох тал дээр маш оновчтой санал хэлж, УИХ-ын гишүүдээ уриалсан гэж болно. Мөн сум орон нутгийн удирдлагууд томилогдоогүй, эзэнгүй байгааг ч шүүмжилж, Засгийн газарт сануулга өглөө.
Тэрээр сонгуулийн үр дүнд бий болсон засаглал, сумын дарга нарыг нь томилох хэрэгтэй байна. Нэгэнт л Засгийн газарт үүрэг өгч байгаа болохоор үүнийг тогтоолдоо тусгаж өгөх хэрэгтэй. Өнөөдөр 300 гаруй сум эзэнгүй байна. Ямар нэгэн асуудал гарвал хэн хариуцах юм гэдгийг ч дуулгалаа.
Бизнесийн алдаа оноотой салбараас гарч ирсэн гишүүн Л.Энх-Амгалан банк санхүүгийн салбарт байдаг хүнд суртал, бусармаг үйл явлыг хамгийн сайн мэдэх хүний нэг. Тиймдээ ч тэр банкны салбарынханг том толгой гаргахын зэрэгцээ маш урт гартай хэмээн ташуурдав. Ингэхдээ тэр “Монголбанк чиглэл өгснөөр зээлийн хүү хэзээ буурч байсан юм бэ. Буурчих байсан бол хамгийн багаар өчнөөн жил буураад, өнөөдөр зээлийн хүү багатай улс орон болчих боломж байсан. Одоо жаахан захиргаадалтын арга хэмжээ авмаар байна. Банкуудад Монголын төр хүнд үед нь маш олонтаа тусалж байсан. Хэдэн зуун тэрбум төгрөгөө гаргаад, өчнөөн удаа тусалж байсан. Хадгаламж эзэмшигчдийнх нь эрсдэлийг төр нуруун дээрээ авч байсан. Одоо банкууд ард иргэдээ бодох цаг зайлшгүй иржээ. Зээлийн хүү, үндсэн зээлийг зогсоож байгаа зэргийг ард иргэдэд маш ойлгомжтой тайлбарлаж хэлэх хэрэгтэй. Өнөөдөр банк бүр өөр өөр хэлж, өөр өөр нөхцөл шахаж байна. Монгол Улсад байгаа 1.8 сая ипотекийн зээлтэй, цалин, тэтгэвэр, арилжааны зээлтэй байгаа хүмүүсийн зээлийн хүү яаж зогсох юм. Өнгөрсөн хавар манайхан хаширсан. Үндсэн зээлийг нь хойшлуулж, зээлийн хүүг төлөөд явж байсан тохиолдол бий” гэх зэргээр шүүмжлэл өрнүүлсэн юм.
О.Баяр
Эх сурвалж: Түмэн.мн
