Ард түмний эв нэгдлийг илэрхийлэгч Ерөнхийлөгчийн сонгуульд МАН-аас нэр дэвшигч У.Хүрэлсүх өнөөдөр /2021.05.29/ соёл урлагийн салбарынхантай уулзаж, мөрийн хөтөлбөрөө танилцууллаа.

Нэр дэвшигч У.Хүрэлсүх “Монгол Улсын оюун санааны тусгаар тогтнол болох соёл урлагийн салбарынхантай уулзаж байна. Ерөнхий сайдаар ажиллаж байхдаа соёл урлагийн салбарт багагүй хөрөнгө оруулалтыг шийдвэрлэж, бүтээн байгуулалтын ажлуудыг эхлүүлсэн. Тухайлбал, Чингис хааны музей, Төв номын сан, үндэсний түүхий музейн барилгын ажлуудыг эхлүүлсэн. Цаашид Үндэсний урлагийн их театртай болох ёстой. Соёл урлагаар дамжуулж иргэдээ соён гэгээрүүлэхийн зэрэгцээ олон улсын зах зээлд эргэлтэд оруулах хэрэгтэй. Хэрэв ард түмэн надад итгэл хүлээлгэвэл соёл урлагийн бодлогыг онцгойлон анхаарч ажиллах болно.

Ерөнхийлөгч болвол эв эвдэх бус эв нэгдэх зарчмыг хэрэгжүүлнэ. Шударга ёсны тэмцлийг үргэлжлүүлж, хөгжил дэвшлийн төлөө зүтгэх болно. Монгол хүн бүр чанартай боловсрол эзэмших, эрүүл мэндийн цогц үйлчилгээг тэгш, хүртээмжтэй хүртэх, хүн амаа өсгөх, гэр бүл, хүүхэд, оюутан, залуучууд, ахмад, эмэгтэйчүүд, хөгжлийн бэрхшээлтэй иргэдээ ивээлдээ авах төрийн бодлогоо тодорхойлсон. Бид нэг улстайгаа бодож төрийн ажлаа хийх ёстой. Ерөнхий сайдаар ажиллаж байхдаа эхлүүлсэн их бүтээн байгуулалтын ажлуудаа эрчимжүүлэн, Газрын тосны үйлдвэрийнхээ үүдийг нээх, хөгжлийн төмөр судас мянганы төмөр замаа бүтээн байгуулах, цахилгаан станцуудаа босгох, хүнс, түлш шатахуун, цахилгаан, эрчим хүч, дулааныхаа дотоодын хэрэгцээг бүрэн хангах, улмаар экспортлох зэргээр хөгжилд тэмүүлсэн зорилтуудаа тодорхойлсон мөрийн хөтөлбөр боловсруулсан. Малчид тариаланчид, баялаг бүтээгчид, хот хөдөөгийн иргэд рүүгээ чиглэсэн байгаль эхээ хайрлах, ногоон үйлдвэрлэлийг дэмжих, мал аж ахуй, газар тариалан, хариуцлагатай уул уурхайг эрчимтэй хөгжүүлэх, шинэ техник, технологи нэвтрүүлэх зэрэг хөгжлийн бодлогоо тусгалаа” гэв.

Ерөнхийлөгчийн сонгуульд МАН-аас нэр дэвшигч У.Хүрэлсүхийн мөрийн хөтөлбөрт “Соёлын бүтээлч үйлдвэрлэл-үндэсний баялаг” гэсэн заалтыг тусгасан юм. Монгол туургатны өв соёлыг “Соёлын бүтээлч үйлдвэрлэл” болгон хөгжүүлэхийг дэмжинэ. Дэлхийд танигдсан соёл, урлагийн монгол брэндийг хөгжүүлэх “Соёлын бүтээлч үйлдвэрлэлийн цогцолбор” байгуулан, соёлын салбарт эхлүүлсэн их бүтээн байгуулалтаа үргэлжлүүлнэ. Соёл, хүмүүнлэгийн дипломат үйл ажиллагааг хэрэгжүүлнэ. Үндэсний соёл, ёс заншил, өв түүхээ ардын болон сонгодог урлаг, кино, рок поп, спорт, хүмүүнлэгийн бүх хэлбэрээр дамжуулан гадаадад сурталчлах ажлыг эрчимжүүлнэ хэмээн тусгасан байгаа юм. Уулзалтад оролцсон соёл урлагийн салбарынхан, У.Хүрэлсүхийн Засгийн газрын үед монгол соёлоо хадгалж, хамгаалах чухал шийдвэрүүд гаргасныг онцолж, салбараараа түүнийг дэмжихээ илэрхийллээ.