Таван толгойн хөрөнгө оруулалтын гэрээний төсөл олны анхаарлыг татаж байна. Энэ талаар сүүлийн өдрүүдэд улс төрчид, эдийн засагч, хуулчьдын дун багагүй маргаан өргөв. Гэрээний төсөл УИХ-д өргөн баригдалгүй УИХ-ын Тамгийн газраас Засгийн газар руу буцсан  тохиолдол ч гарлаа. Хуулийн дагуу бүрдэл болоогүй баримт бичиг оруулах гэснээс “төрхөмдөө” буцсан гэж байгаа. Мөн гэрээний төслийг тойрсон хардлага, шүүмжийн үзүүр  Таван толгойн нүүрс тээвэрлэлтийн нэг гол хэсэг буюу “Шинэ төмөр зам” төслийн  санхүүжилт, түүний гүйцэтгэл рүү чиглэв. Баахан овоолсон шороон далангаас өөр зүйл хийгдээгүй, төслийн санхүүжилтийн 280 тэрбум төгрөг салхинд хийсч алга болсон гэх “том” шүүмжлэгчид ч гараад иржээ. 

“Шинэ төмөр зам төслийн хүрээнд Ухаа худаг-Гашуун сухайтын чиглэлд 267 км  төмөр  зам баригдана. Үүний суурь бутцийн ажлыг “Samsung C&T” компанитай байгуулсан гэрээний дагуу “Монголын төмөр зам” ТӨХК гүйцэтгэж байгаа. Төслийг урагшлуулах гэсэн хүмүүсийн нэг нь Зам тээврийн сайд асан А.Гансүх. Одоо тэр УИХ-ын дарга З.Энхболдын зөвлөхөөр ажиллаж байна. Мөн “Женко” Х.Баттулга ч гар бие оролцсон гэх бөгөөд өнгөрсөн онд Ерөнхийлөгч Ц.Элбэгдорж түүнийг үндэстний асуудал нэвтрүүлэгтэй холбогдуулан өрөөндөө дуудаж сануулга өгөхдөө “Чиний тэр зөмөр зам хаана байна” хэмээн зэмлэж байсан. Төмөр зам барих ажил сунжирч буй нь яах аргагүй үнэн. Санхүүжилтийг шийдэлгүй цаг алдсан явдал ч бий. Гэхдээ Чингэс бондоос 200 сая ам.долларын санхүүжилт өгсөн. Ажил хэр зэрэг бүтээмжтэй болсон нь харин эргэлзээтэй. Иймээс  хэл ам, хадлага тасрахгүй байгаа байх.

Элдэв хардлагыг  нэг мөр эцэслэж,  өөрт нь наасан “шавар”-ыг арилгахын тулд харин А.Гансүх Монгол улсын Ерөнхий аудитор А.Зангадад ханджээ. Тэрбээр “...төмөр замын суурь бүтцийг барих ажлын санхүүгийн гүйцэтгэлд зохих журмын дагуу аудитын шалгалт хийж, дүнг төрийн эрх бүхий байгууллага, албан тушаалтан, олон нийтэд ил тод мэдээлнэ үү" гэжээ. Аудитын шалгалт хийгдэж,  дүн тавигдах биз.

Б.Отгонбаяр 

Эх сурвалж: Tumen.mn