Төрийн эрх барих дээд байгууллага парламентаа бүрдүүлэх наймдахь удаагийн сонгуулийн дүн өчигдөр орой 22 цагт урьдчилсан байдлаар гарч МАН-ын нам үнэмлэхүй ялалт байгууллаа. Төр түмэн олон түүхэн сонголтоо мэргэн хийж чадлаа. Иргэд АНдуурсанаа ухаарч МАНдуулахаар шийдэж, итгэл хүлээлгэсэн нь илт харагдаж байлаа. Зарим нэг хүмүүсийн ярьж буйгаар сонгогчид хүнийг нь биш намыг нь харж сонголтоо хийжээ гэж ярьж байна.
Энэ удаагийн сонгуульд АН муугийн муу дүн авч, ялагдлаа хүлээн зөвшөөрөв.
Тодруулбал, 76 суудлын 65-ыг нь МАН авсан бол 9-хөн суудлыг нь АН-ынхан авчээ. Гэхдээ тэд энэ суудлаа чамлахгүй чанга атгах нь тодорхой юм. Харамсалиай нь намын овгорууд өвдөг шороодсон гэж бодохоор.
Намынхаа лидерүүд болох З.Энхболд, Ч.Сайханбилэг, Н.Алтанхуяг, Х.Тэмүүжин, М.Батчимэг Л.Гантөмөр нарын хүмүүс ялагдав. Аргагүй дээ өнгөрсөн дөрвөн жилийн хугацаад энэ намыг хэрхэн ажилласан талаар ард түмэн харсан бас үзсэн. Төр түмэн нүдтэй гэж энэ дээ, дараагийн удаагийн сонголтоо тэд зөв хийж чадлаа.
Одоо МАН-ынханд итгэхэд алдахгүй ээ, бас айдасгүй ээ. За ингээд энэ удаагийн сонгуульд ямар ямар нэр дэвшигчид ялалт байгуулсан талаар тодорхойлъё. УИХ-ын суудлын 65-ыг МАН-ынхан авсан бөгөөд шинээр сонгогдсон гишүүдэд халуун баярыг хүргэе ээ.
Архангай аймаг. Аймгийн Засаг дарга асан Ё.Баатарбилэг, МАН-ын ерөнхий нарийн бичгийн дарга Ж.Мөнхбат, Г.Тэмүүлэн нар ялалт байгууллаа. Баян-Өлгийд. Г.Солтан, Д.Мурат, А.Баделхан нарын шинэ хүмүүс гарч ирлээ.
Баянхонгорт. Г.Занданшатар, М.Билэгт, А.Элдэв-Очир нарын шинэ хүмүүс тодров. М.Билэгтийг “Бишрэлт”-ын Билэгт гэдгээр нь илүү сайн таних байхаа. Анхдагчдийн өлгий нутаг болох Булган ганц мандатай байсан бөгөөд МАН-аас ялалт байгуулж Ж.Бат-Эрдэнэ гарч ирлээ.
Говь-Алтайд Ш.Раднаасэд гарч ирлээ. Түүний хувьд МХЕГ-ын дарга асан бөгөөд ийнхүү анх удаагаа УИХ-д суухаар болов.
Говьсүмбэрт. Яруу найрагч Гомпилдоогийн Мөнхцэцэг илт давуу гарч иржээ.
Дорноговь аймагт Борхүүгийн Дэлгэрсайхан ялалт байгууллаа. Тэр мөн л анх удаа УИХ-д суудал авлаа. Дорнодод хуучны акулууд буюу Х.Болорчулуун Н.Номтойбаяр хоёр намаасаа дахин ялалт байгуулав.
Дундговь аймагт АН-аас Б.Наранхүү ялалт байгуулсан бол түүний төрсөн эгч Б.Саранчимэг МАН-аас Баянзүрх дүүргийн 51 дүгээр тойрогт ялалт байгуулжээ. Ийнхүү зулай зулайгаа гишгиж төрсөн эгч дүүс УИХ-д цуг суухаар болов.
Хутагтуудын өлгий нутаг Завханд АН-ынхан ялалт байгуулжээ. Тухайлбал, Санхүүгийн зохицуулах хорооны дарга асан Загдхүүгийн Нарантуяа, Ядамсүрэнгийн Санжмятав нар ялалт байгуулав.
Өвөрхангай аймагт Я.Содбаатар дахин сонгогдож, аймгийн Засаг дарга Д.Тогтохсүрэн, С.Чинзориг нар шинээр сонгогдлоо.
Өмнөговь аймагт МАН-аас Н.Амарзаяа, Л.Энхболд хоёр ялалт байгуулав.
Сүхбаатар аймагт Чүлтэмийн Улаан ганцаараа ялжээ.
Сэлэнгэ аймаг МАН-ын хоёр хүн гарч ирэв. Тодруулбал, Ж.Эрдэнэбат, Н.Оюундарь, АН-аас Аж үйлдвэрийн сайд Д.Эрдэнэбат гарч ирлээ.
Төв аймагт МАН-аас хоёр Энхболд, аварга А.Сүхбат нар гарч ирлээ. Аваргын хувьд ийнхүү УИХ-ын гишүүн болов.
Алс баруун хязгаар Увс нутгаас Д.Чойжилсүрэн Ч.Хүрэлбаатар нар дахин сонгогдож, Н.Цэрэнбат гэгч “битүү морь” гарч ирлээ.
Ховд аймгаас С.Бямбацогт дахин сонгогдож, хоёр “битүү морь” гарч ирсэн нь Б.Очбадрах, О.Батнасан нар юм.
Хоймор нутаг болох Хөвсгөлөөс МАН-ын гурван нэр дэвшигч мандлаа. Л.Мөнхбаатар, Ц.Даваасүрэн, Л.Энх-Амгалан нар төр түшилцэнэ.
Хэнтийгээс аварга Б.Бат-Эрдэнэ дахин сонгогдож, хоёр залуу нэр дэвшигч цойллоо. Тодруулбал, Л.Оюун-Эрдэнэ, хамгийн залуу нэр дэвшигч Ч.Гантулга ялалт байгуулав.
Дархан-Уул аймагт Д.Хаянхярваа дахин сонгогдож, Монголбанкны Б.Жавхлан, Б.Баттөмөр нар ялалт байгуулав.
Орхон аймгаас О.Содбилэг, Д.Дамба-Очир, МАХН-аас ганц суудал авсан О.Баасанхүү нар ялалт байгуулав.
Баянзүрх дүүрэгт Д.Оюунхорол, Ж.Энхбаяр хоёр дахин сонгогдож, Б.Саранчимэг, Засаг дарга асан Б.Батзориг, АН-аас Ж.Батзандан, бие даагч МУГЖ С.Жавхлан саналаараа илүүрхэж ялалт байгуулав. Бие даасан нэр дэвшигчдээс тэрбээр ганцаараа ялав.
Хан-Уул дүүргээс МАН-аас Д.Сарангэрэл, Б.Энх-Амгалан, Ц.Нямдорж нар ялж, АН-аас Лу.Болд нэг суудалтай үлдэв.
Сүхбаатар дүүрэгт дандаа МАН-ынхан ялалт байгуулсан. Тухайлбал, Д.Цогтбаатар, Ц.Мөнх-Оргил, Ц.Цогзолмаа, Сү.Батболд нар УИХ-ын суудал авлаа. Чингэлтэй дүүрэгт бас МАН-ынхан мандав. Т.Аюурсайхан, засаг дарга Д.Ганболд, Ө.Энхтүвшин, сэтгүүлч М.Оюунчимэг нар яллаа.
Баянгол дүүрэгт МАН-аас А.Ундараа, “Оргил”-ын Ж.Ганбаатар, АН-аас сайд С.Эрдэнэ ялалт байгуулав.
Сонгинохайрхан дүүрэгт Н.Учрал, Ц.Гарамжав, Д.Сумъяабазар, Х.Нямбаатар, Б.Ундармаа, Д.Тэрбишдагва нар МАН-аас ялалт байгуулжээ.
Ийнхүү ард түмнийхээ итгэлийг хүлээсэн МАН-ынхан үнэмлэхүй ялалтаар энэ удаагийн сонгуулийг өндөрлөж, ирээдүйн дөрвөн жилд улс эх орондоо иргэдийнхээ төлөө илүү ихийг хийж бүтээхийг амлалаа.
Тэд хийж чадна, хэрхэн ажиллахыг л харах цаг хугацаа үлдлээ дээ. Дашрамд сонирхуулахад, Жавхлан нэртэнгүүд хоёр сууж, эгч дүүс УИХ-д суухаар болов. Гэхдээ тэд хоёр өөр намын гишүүд юмаа.
О.Сайхан
