Сэтгүүлч Л.Мөнхбаясгаланг 2016 оны 5 дугаар сарын 25-ны орой ажлын бус цагаар Эрүүгийн цагдаагийн газраас дуудан газар дээр нь эрүүгийн хэрэг үүсгэж, сэжигтнээр тооцон Монгол Улсын хилээр гарах эрхийг нь хаасан. Энэхүү үйлдлийг сэтгүүлчийн мэргэжлийн эрхэд ноцтойгоор халдаж, хөндлөнгөөс саад учруулах үйлдэл болсон гэж “Ардчилсан Сайтуудын Клуб” Төрийн бус байгууллага үзэж, эрс эсэргүүцэж байгаагаа албан ёсоор мэдэгдье.

Сэтгүүлч Л.Мөнхбаясгаланг УИХ-ын ээлжит сонгууль болохын өмнөх өдрүүдэд гэмт хэрэгт холбогдуулан байцааж байгаа нь “Сэтгүүлчийн хуульд нийцсэн үйл ажиллагаанд саад хийх” гэмт хэргийн шинжтэй байж болзошгүй байна. “Өөрийн болон бусдын ашиг сонирхлыг хөндсөн аливаа мэдээллийг олон нийтэд тараах, эсхүл тараалгахгүй байхын тулд сэтгүүлчийн хуульд нийцсэн үйл ажиллагаанд саад хийх”, “Энэ хэргийг албан тушаалын байдлаа ашиглаж хийх” гэмт үйлдлүүдийг сонгуультай холбоотой улс төрийн зорилгоор ч хийсэн байж болзошгүй нь сэтгүүлчтэй холбоотой үйл явдлуудаас харагдаж байгаа юм. Энэ үйлдлийг бид хэвлэлийн эрх чөлөө, сэтгүүлчийн мэргэжлийн эрх, олон түмнийг бодит мэдээ, мэдээллээр хангах эрх рүү дайрсан халдлага хэмээн үзнэ. Иймд сэтгүүлчийн мэргэжлийн эрхэд халдаж, бүр эрүүгийн хэрэг үүсгэн шалгаж эхэлсэн бусармаг үйлдлээ нэн даруй зогсоохыг шаардаж байна.

Сэтгүүлч нь олон нийтийн өмнөөс нийгэмд шаардлагатай, олон нийтийн хүсэн хүлээж байгаа бодит мэдээллийг цуглуулах, эрж хайх, боловсруулах, түгээх онцгой үүрэгтэй. Сэтгүүлч Л.Мөнхбаясгалангийн ажил үүргээ гүйцэтгэх боломжийг хааж, хавчсан уг үйлдэл нь Монгол Улсад хэвлэлийн эрх чөлөөг улам боомилж, сэтгүүлчдийг айдас хүйдэст автуулж, мэргэжлийн ажлаа хийх хүсэл зоригийг мохоох аюулыг араасаа дагуулж буйгаараа ноцтой юм. Иргэдийн мэдэх эрхийг хангаж, аливаа мэдээ мэдээллийг олон нийтэд түгээх сэтгүүлчийн үүргээ биелүүлснийхээ төлөө гэмт хэрэгтэн болдог буруу жишиг тогтохоос бид эмээж байна. Энэ бүхний эцэст ардчиллын амин сүнс болсон иргэдийн мэдэх эрх хязгаарлагдаж иргэд, ард түмэн хохирно.  “Ардчилсан Сайтуудын Клуб”-ийн гишүүн сайтууд, түүнд ажилладаг нийт сэтгүүлч, ажилтнууд бид Монголынхоо бүх сэтгүүлч, хэвлэл мэдээллийн салбарынханд хандаж мэргэжил нэгт нөхрийнхөө төлөө санаа тавьж, дуу хоолойгоо нэгтгэж, эв нэгдлээ бэхжүүлэн, сэтгүүлч нөхрөө, мэргэжлээ, салбараа, уншигч, үзэгч, сонсогч, хэрэглэгч түмнээ хамгаалахыг уриалж байна. Манай клуб сэтгүүлч Л.Мөнхбаясгалантай холбоотой асуудлыг цаашид анхааралтай ажиглаж, сэтгүүлчийн мэргэжлийн эрх, хэвлэл мэдээллийн эрх чөлөөний эсрэг үйлдэл бүрийг таслан зогсоохын төлөө тууштай тэмцэх болно.

ХАНДАЛТААРАА ТЭРГҮҮЛЭГЧ “АРДЧИЛСАН САЙТУУДЫН КЛУБ”