Сүүлийн өдрүүдэд зүүн гурван аймагт гарсан гал түймэр нэлээдгүй газрыг хамарч улсад үлэмж хохирол учруулаад байгаа. Энэхүү хүнд нөхцөл байдалтай биечлэн танилцахаар Монгол улсын Ерөнхийлөгч Ц.Элбэгдорж түймрийн голомттой аймгуудад ажиллаж байгаа. Харин энэ үеэр цахим ертөнцөөр олны дургүйцлийг хүргэсэн нэгэн зураг шуугиан тариад авсан. Энэ нь Ерөнхийлөгч түймэрт өртсөн аймгуудад ажиллах үеэр түймрийн голомт дээр ажиллаж буй зургаа фотошопдож оруулсан нь хэл ам дагуулсан. Тэгвэл Ц.Элбэгдорж энэ зургийн тухай тайлбар хийжээ. Тэрээр “Галын шугаманд ажиллах иргэдээрээ бахархав. Тэд ч сэтгэлийн дэм авлаа, баярлалаа гэцгээж байв. Өмнө оруулсан зургийг зарим нь эвлүүлэг мэт мушгижээ. Эвдэрснийхээ хэрээр бусдыг дүгнэх нь өрөөсгөл. Энэ богино бичлэгээс бодит ойлголт авч болно. Миний оруулж байгаа зураг, бичлэгт ямар нэг эвлүүлэг, худал зүйл байхгүй болно. Нийтийн мэдээлэлд бид хариуцлагатай, ёс зүйтэй хандах нь чухал. Сэтгэл зөв бол үйлс зөв” хэмээн доорх бичлэгийг оруулжээ.
Эх сурвалж: Шуурхай.мн
