Тэртээ жаран жилийн өмнө дайны улмаас элэг нэгтнүүд салж, орчин үед нэг нэгнийхээ эсрэг харж зогсох болжээ. Энэ бол Хойд болон Өмнөд Солонгос улс.

Дайны уршгаар иргэд ах дүүс, аав ээжээсээ албан хүчээр салж, эрх баригчдын уулзалт товлох өдрийг хүлээсээр насыг элээх тавиланд унасан юм. Өдгөө тэдгээр иргэдийн түрүүч аль хэдийн насан эцэслэж, амьд нэг нь амжиж ахан дүүсийнхээ царайг нь харах сан гэсэн ганц хүсэл тээх болжээ. Тэд гол төлөв 60-70 насныхан байгаа билээ.

Энэ долоо хоногт эхэлсэн салсан гэр бүлүүдийн эргэн уулзалтаар улс тус бүрээс 100 хүн сонгогдсон бөгөөд тэдний нас, эрүүл мэндийн шалтгааныг харгалзан үзэж лоттерейн системээр сонгосон юм.

Нулимс дүүрэн тус уулзалт  хоёр орны эрх баригчдын зүгээс хатуу хараа хяналтан дор явагдаж байгаа бөгөөд амьдын хагацал үзсэн хөгшчүүл хэн хэнээсээ хүссэн бүхнээ асуух эрхээр дутагдаж байна.

Тэдэнд юу асууж, юу ярьж үл болох тухай дүрмийг мөрдөхийг шаардсан байна. Тэд Хойд Солонгосын хоол хүнсний хомсдол, удирдагч Ким Жон Уны тухай, улс орны эдийн засгийн тухай ярьж, асуухыг хоригложээ.

Өмнөд Солонгосын дүрэм

Өмнөд Солонгосчууд салсан гэрийнхнээсээ гол төлөв яаж амьдарч байгаа, хоол хүнсний байдал ямар байгаа, өлсөж зовж байгаа тухай асуухыг хүсдэг байна.

Гэвч энэ бол улс орны дотоод асуудалд оролцсон хэрэг гэж Хойд Солонгосын зүгээс үзэж, улмаар энгийн нэг яриа улс төрийн хэмжээнд хүртэл хурцдаж болзошгүй, мөн энэ тухай болгоомжгүйгээр асуух аваас Хойд Солонгост амьдардаг гэр бүлийнхэнд нь таагүй асуудал үүсч магадгүй тухай анхааруулжээ.

Хойд Солонгосын тандалт:

Өнгөрсөн жил улзалтад оролцсон Өмнөд Солонгосчуудын хэлж буйгаар Хойд Солонгосын албаны хүмүүс өөрийн орны иргэдийг ажиглаж, тандаж байсан гэв. Эргэж уулзсан настангууд хэн нэгэн яриаг нь сонсож байх вий гэдгээс айгаад, сэтгэлээ онгойтол ярьж хөөрч чадаагүй тухай оролцогчид хэлж байсан байна.

Бэлэг өгөх хязгаарлалт

Өмнөдийнхөн Хойд Солонгост амьдарч буй гэр бүлийнхэндээ тансаг хэрэглээний зүйлс бэлэглэж болохгүй. НҮБ-ын Аюулгүйн Зөвлөлөөс Хойд Солонгосын цөмийн болон пуужингийн туршилтуудаас шалтгаалж хориг арга хэмжээ авсан байгаа.
 

Бэлгэнд 88 доллараас ихгүй үнэтэй зүйлс байх  ба гол төлөв архи, гоо сайхны бүтээгдэхүүн, цаг зэрэг байгаа бол алт, мөнгө, сувд өгөхийг хориглосон байна. Бэлэн мөнгөний хувьд америк доллар байх ба 1500 доллараас их байж болохгүй аж. Тэгээд ч Өмнөд Солонгосчууд ах дүүдээ хэрэв их мөнгө бэлгэнд өгөх аваас Хойд Солонгосын эрх баригчид хурааж авна гэж боддог байна. Харин Хойд Солонгосчууд гол төлөв нутгийн архиар бэлэг барьдаг ажээ.