Шадар сайд С.Амарсайхан өнөөдөр “Энхсаран” сувилалд нөлөөлсөн МХЕГ-ын ажилтнуудад хариуцлага тооцно” гэж мэдэгдсэн. Хэдийгээр түүний эрхэлсэн асуудал бүхий салбар боловч “Энхсаран сувилалд халдвар алдсан гол шалтгаан нь мэргэжлийн хяналтын байгууллагын эрх бүхий албан тушаалтнуудын харьяа байгууллага байсан учраас нөлөө орсон. Улмаар дэглэм алдагдсан. Мэргэжлийн хяналтын байгууллагын холбогдох албан тушаалтнуудад хариуцлага тооцох ёстой” гэж мэдэгдсэн юм.
Баттай эх сурвалжийн мэдээлснээр Мэргэжлийн хяналтын байгууллагын эрх бүхий алба цээрийн тушаалтан гэдэг нь МХЕГ-ын ЭИХХЦХГ /Экспорт, импорт хилийн хорио цээрийн хяналтын газрын дарга Т.Төмөрбаатар бөгөөд “Энхсаран” сувилал нь түүний төрсөн ахын эзэмшлийн өмч бөгөөд ахынх нь гэр бүлийн хүн ажиллуулдаг аж. Гэвч тэрбээр одоогийн албан тушаалд томилогдох үедээ “Тус сувилалын газрыг хамаарал бүхий хүмүүс нь ажиллуулдаг гэдгийг няцаагаагүй боловч дэглэм алдагдсан асуудалд сувиллын газар гэхээсээ ОБЕГ хяналт тавьж, ХӨСҮТ хуваарилалт хийх үүрэг хүлээсэн” хэмээж байсан гэнэ. Шадар сайдын өнөөдрийн мэдээллийн дараа МХЕГ-ын ЭИХХЦХГ /Экспорт, импорт хилийн хорио цээрийн хяналтын газрын дарга Т.Төмөрбаатартай холбогдоход “Энхсаран сувилалтай ямар нэг холбоо, хамаарал байхгүй” гэж хариулаад дуудлагыг тасалсан юм. Тэгэхээр Шадар сайдын авсан мэдээлэл үнэн зөв байсан уу, “...мэргэжлийн хяналтын байгууллагын эрх бүхий албан тушаалтнуудын харьяа байгууллага байсан учраас нөлөө орсон”, “...халдвар алдсан гол шалтгаан нь...” гэж байгаад хийсэн мэдээлэл нь бодит байдалд хэр нийцэх, батлагдсан мэдээлэл бол хэзээ, хэрхэн хариуцлага тооцох вэ гэдэг нь анхаарал татаж байна.
